കേരള സാ​ങ്കേതിക സർവകലാശാല പരീക്ഷകൾ റദ്ദാക്കിയ ഉത്തരവിന്​ സ്​റ്റേ

കൊച്ചി: കേരള സാ​ങ്കേതിക സർവകലാശാല പരീക്ഷകൾ റദ്ദാക്കിയ ഹൈകോടതി സിംഗിൾ ബെഞ്ച്​ ഉത്തരവിന്​ സ്​റ്റേ. ഹൈകോടതി ഡിവിഷൺ ബെഞ്ചാണ്​ ഉത്തരവ്​ സ്​റ്റേ ചെയ്​തത്​. സാ​ങ്കേതിക സർവകലാശാല സമർപ്പിച്ച അപ്പീൽ ഹരജിയിലാണ്​ ഉത്തരവ്​. വിധിയുടെ പശ്​ചാത്തലത്തിൽ ജൂലൈ 29 മുതലുള്ള എല്ലാ പരീക്ഷകളും മുൻനിശ്​ചയിച്ച പ്രകാരം നടത്തുമെന്ന്​ സർവകലാശാല അറിയിച്ചു.

നേരത്തെ സർവകലാശാലയുടെ ബി ടെക്​ പരീക്ഷകളാണ്​ കോടതി റദ്ദാക്കിയത്​. ഒന്ന്​, മൂന്ന്​ സെമസ്റ്ററുകളിലെ പരീക്ഷകളാണ്​ റദ്ദാക്കിയത്​. ഇതിനെതിരെയായിരുന്നു സർവകലാശാലയുടെ അപ്പീൽ. ആഗസ്റ്റ്​ രണ്ട്​, മൂന്ന്​ തീയതികളിലെ പരീക്ഷകൾ മുൻനിശ്​ചയിച്ച പ്രകാരം നടത്താമെന്ന്​ ഹൈകോടതി ഡിവിഷൺ ബെഞ്ച്​ ഉത്തരവിൽ വ്യക്​തമാക്കുന്നു. ഇന്ന്​ മാറ്റിവെച്ച പരീക്ഷ മറ്റൊരു ദിവസം നടത്താനും നിർദേശിച്ചു.

യു.ജി.സി മാനദണ്ഡപ്രകാരമാണ്​ പരീക്ഷകൾ നടത്തിയതെന്ന്​ ഹൈകോടതിയെ സർവകലാശാല അറിയിച്ചു. ഓൺലൈൻ സൗകര്യമില്ലാത്തിടത്ത്​ ഓഫ്​ലൈനായി പരീക്ഷ നടത്താൻ യു.ജി.സി അനുമതി നൽകിയിട്ടുണ്ട്​. പൂർണമായും ഓൺലൈനായി പരീക്ഷ നടത്താനുള്ള സൗകര്യങ്ങൾ ഒരുക്കണമെങ്കിൽ ഒരു വർഷമെങ്കിലും വേണ്ടി വരുമെന്നും സർവകലാശാല കോടതിയെ അറിയിച്ചു.