രാംനാഥ്​ കോവിന്ദിന്‍റെ സന്ദർശനത്തെ തുടർന്ന്​ ട്രാഫിക്​ നിയന്ത്രണം; 50കാരി മരിച്ചു, ക്ഷമ ചോദിച്ച്​ പൊലീസ്​

ലഖ്​നോ: രാഷ്​ട്രപതി രാംനാഥ്​ കോവിന്ദിന്‍റെ സന്ദർശനവുമായി ബന്ധ​പ്പെട്ട്​ ഏർപ്പെടുത്തിയ ഗതാഗത നിയന്ത്രണത്തിൽപെട്ട്​ ആശുപത്രിയിൽ എത്താൻ കഴിയാതെ അസുഖ ബാധിതയായ 50കാരി മരണപ്പെട്ടു. ഇന്ത്യൻ അസോസിയേഷൻ ഓഫ് ഇൻഡസ്ട്രീസിന്‍റെ കാൺപൂർ ചാപ്റ്റർ വനിതാ വിഭാഗത്തിന്‍റെ മേധാവിയായ വന്ദന മിശ്രയാണ്​ മരിച്ചത്​. ഉത്തർപ്രദേശിലെ കാൺപൂരിലാണ്​ സംഭവം.

ശാരീരികാസ്വാസ്ഥ്യം ഗുരുതരമായതോടെ വന്ദന മിശ്രയെ അവരുടെ കുടുംബം സ്വകാര്യ ആശുപത്രിയിൽ പ്രവേശിപ്പിക്കുന്നതിനായി കൊണ്ടുപോവുകയായിരുന്നു. എന്നാൽ രാംനാഥ്​ കോവിന്ദിന്‍റെ സന്ദർശനം പ്രമാണിച്ച് അവർ യാത്ര ചെയ്ത റൂട്ടിൽ ഏറെ നേരം​ ഗതാഗത നിയന്ത്രണം വന്നതോടെ പെ​ട്ടെന്ന്​ ആശുപത്രിയിൽ എത്തിക്കാൻ സാധിക്കാതെ വരികയു​ം ആശുപത്രിയിൽ എത്തിച്ച​പ്പോഴേക്ക്​ മരണം സംഭവിക്കുകയുമായിരുന്നു. ഇയടുത്ത കാലത്താണ്​ വന്ദന മിശ്ര കോവിഡിൽ നിന്ന്​ മുക്തയായത്​.

സംഭവത്തിൽ ക്ഷമാപണവുമായി കാൺപൂർ പൊലീസ്​ മേധാവി രംഗത്തെത്തി. ട്വിറ്ററിലാണ്​ അദ്ദേഹം ക്ഷമാപണം നടത്തിയത്​.

''വന്ദന മിശ്രയുടെ മരണത്തിൽ കാൺപൂർ പൊലീസിന്‍റെ പേരിലും സ്വന്തം പേരിലും ഞാൻ ക്ഷമാപണം നടത്തുകയാണ്​. ഇത്‌ ഭാവിയിലേക്കുള്ള ഒരു വലിയ പാഠമാണ്. ഞങ്ങളുടെ 'റൂട്ട്' സമ്പ്രദായം പൗരന്മാരെ ഏറ്റവും കുറഞ്ഞ സമയത്തേക്ക് നിയന്ത്രിക്കുന്ന തരത്തിലായിരിക്കുമെന്ന് ഞങ്ങൾ ഉറപ്പ്​ നൽകുന്നു. അതിനാൽ ഇനി ഇത്തരം സംഭവങ്ങൾ ആവർത്തിക്കില്ല.'' -കാൺപൂർ പോലീസ് മേധാവി അസിം അരുൺ ട്വീറ്റ് ചെയ്തു.

വന്ദന മിശ്രയുടെ മരണം രാഷ്​ട്രപതിയെ അസ്വസ്ഥനാക്കിയിട്ടുണ്ടെന്നും മറ്റൊരു ട്വീറ്റിൽ അദ്ദേഹം വ്യക്തമാക്കി.

''അദ്ദേഹം (രാഷ്ട്രപതി) പൊലീസ് കമ്മീഷണറെയും ജില്ലാ മജിസ്‌ട്രേറ്റിനെയും വിളിച്ച് സംഭവത്തെക്കുറിച്ച് അന്വേഷിച്ചു. കുടുംബത്തോട്​ വ്യക്തിപരമായി അനുശോചനം അറിയിക്കാൻ അദ്ദേഹം ഉദ്യോഗസ്ഥരോട് ആവശ്യപ്പെട്ടിട്ടുണ്ട്​" പൊലീസ് പറഞ്ഞു.

സംഭവത്തെ കുറിച്ച്​ അന്വേഷണം നടത്താൻ മുതിർന്ന പൊലീസ് ഉദ്യോഗസ്ഥനോട് ആവശ്യപ്പെട്ടിട്ടുണ്ട്. ഒരു സബ് ഇൻസ്പെക്ടറെയും മൂന്ന് കോൺസ്റ്റബിൾമാരെയും സസ്പെൻഡ് ചെയ്യുകയും ചെയ്​തു.

രാഷ്​ട്രപതി മൂന്ന് ദിവസത്തെ യുപി സന്ദർശനത്തിലാണ്. അതിനിടെ അദ്ദേഹം അയൽരാജ്യമായ കാൺപൂർ ദേഹാത്ത് ജില്ലയിലുള്ള സ്വന്തം ഗ്രാമവും സന്ദർശിക്കും. ശനിയാഴ്ച രാത്രി ട്രെയിനിൽ കാൺപൂരിലെത്തിയ അദ്ദേഹം തിങ്കളാഴ്ചയും ചൊവ്വാഴ്ചയും ലഖ്‌നോവിൽ ചെലവഴിക്കും.