കനത്ത മഴ: കർണാടകയിൽ പരക്കെ നാശനഷ്​ടം

ബംഗളൂരു: കനത്ത മഴയെ തുടർന്ന്​ കർണാടകയിലെ വിവിധ പ്രദേശങ്ങളിൽ കനത്ത നാശനഷ്​ടങ്ങൾ. തീരദേശ ജില്ലകളായ ദക്ഷിണ കന്നഡയിലും ഉഡു​പ്പിയിലും വെള്ളപ്പൊക്കം കെടുതി വിതച്ചു. റോഡുകൾ പലതും വെള്ളത്തിനടിയിലാണ്​. ഗതാഗതം സംവിധാനങ്ങൾ തടസ്സപ്പെട്ടതോടെ ജനജീവിതം സ്​തംഭിച്ചിരിക്കുകയാണ്​. 

മഴയെ തുടർന്ന്​ 12 പേർക്ക്​ പരിക്കേറ്റു. മംഗളൂരുവിൽ 52 വീടുകൾക്കും ബന്ദ്​വാളിൽ 12 വീടുകൾക്കും കേടുപാടുകൾ സംഭവിച്ചു. അഞ്ച്​ ദുരിതാശ്വാസ ക്യാമ്പുകൾ തുറന്നിട്ടുണ്ട്​. മുമ്പെങ്ങുമില്ലാത്ത തരത്തിലുള്ള മഴക്കും വെള്ളപ്പൊക്കത്തിനുമാണ്​ മംഗളൂരു നഗരം സാക്ഷ്യം വഹിച്ചത്​.

വെള്ളപ്പൊക്കത്തെ തുടർന്ന്​ സ്​കൂളിനകത്ത്​ അകപ്പെട്ടുപോയ കുട്രോളി അലകെയിലെ സ്കൂൾ വിദ്യാർഥികൾ ഉൾപ്പെടെയുള്ളവരെ ബോട്ടുകൾ ഉപയോഗിച്ച്​ രക്ഷപ്പെടുത്തും. അഗ്​നിശമനസേനയും പൊതുജനങ്ങളും രക്ഷാപ്രവർത്തനത്തിന്​ സഹായവുമായി രംഗത്തുണ്ട്​. ബൈക്കമ്പാടി വ്യവസായ മേഖലയിലെ വ്യവസായ ശാലകളിലേക്ക്​ വെള്ളം കയറിയതിനെ തുടർന്ന്​ വലിയ നാശനഷ്​ടമാണുണ്ടായത്​. പല സ്​ഥലങ്ങളിലും വാഹനങ്ങൾ വെള്ളത്തിനടിയിലായി. ഉഡ​ുപ്പി ജില്ലയിൽകഴിഞ്ഞ രണ്ടു ദിവസത്തോളമായി പെയ്യുന്ന കനത്ത മഴയിൽ വീടുകളടക്കം 130ഒാളം കെട്ടിടങ്ങൾ ഭാഗികമായോ പൂർണമായോ തകർന്നതായാണ്​ വിവരം. 

കർണാടകയുടെ വിവിധ ഭാഗങ്ങളിൽ കനത്ത മഴയെ തുടർന്ന്​ ദുരിത ബാധിതരായവരുടെ സുരക്ഷക്കായി പ്രാർഥിക്കുന്നതായും എല്ലാവിധ സഹായങ്ങളും ഉറപ്പാക്കാനായി ഉദ്യോഗസ്​ഥർക്ക്​ നിർദ്ദേശം നൽകിയതായും പ്രധാനമന്ത്രി നരേന്ദ്രമോദി ട്വീറ്റ്​ ചെയ്​തു. മുഖ്യമന്ത്രി എച്ച്​.ഡി. കുമാരസ്വാമി ഡെപ്യൂട്ടി കമീഷണറോട്​ സ്​ഥിതിഗതികൾ ആരായുകയും  രക്ഷാപ്രവർത്തനങ്ങൾ നടത്താനായി തീര രക്ഷാസേനക്ക്​ നിർദ്ദേശം നൽകുകയും ​െചയ്​തു. 

കേന്ദ്ര ആഭ്യന്തരമന്ത്രി രാജ്​നാഥ്​സിങ്​ കർണാടകയിലെ സാഹചര്യം വിലയിരുത്തിയതായും ആവശ്യമെങ്കിൽ കൂടുതൽ എൻ.ഡി.ആർ.എഫ്​ സംഘത്തെ തന്നെ മംഗളൂരുവിലേക്ക്​ അയക്കാൻ ആഭ്യന്തര സെക്രട്ടറിക്ക്​ നിർദ്ദേശം നൽകിയതായും ആഭ്യന്തരമന്ത്രിയുടെ ഒാഫീസ്​ ട്വീറ്റ്​ ചെയ്​തു.

മൺസൂണിനു മുമ്പുള്ള മഴയാണ്​ ഇപ്പോൾ കർണാടകയിൽ പെയ്​തുകൊണ്ടിരിക്കുന്നതെന്നും മൺസൂണി​​​െൻറ കൃത്യമായ വരവ്​ സംബന്ധിച്ച്​ ര​ണ്ടോ മൂന്നോ ദിവസം കഴിഞ്ഞു പ്രഖ്യാപിക്കുമെന്നുമാണ്​ മെട്രോളജിക്കൽ വിഭാഗം വ്യക്തമാക്കുന്നത്​.