തമിഴ്​നാട്ടിൽ കനത്തമഴ തുടരുന്നു; ആറ്​ ജില്ലകളിൽ പ്രളയ മുന്നറിയിപ്പ്​

ചെന്നൈ: തമിഴ്​നാട്ടിൽ കനത്ത മഴ തുടരുന്നു. സംസ്ഥാനത്തിന്‍റെ വിവിധ ഭാഗങ്ങളിൽ ബുധനാഴ്​ച വൈകീട്ട്​ കനത്ത മഴയാണ്​ പെയ്​തത്​. ചെന്നൈ, ചെങ്കൽപേട്ട്​, തിരുവള്ളൂർ, കാഞ്ചീപുരം, വില്ലുപുരം ജില്ലകളിലാണ്​ മഴ തുടരുന്നത്​. വ്യാഴാഴ്ച വൈകുന്നേരം വരെ മഴ തുടരാൻ തന്നെയാണ്​ സാധ്യത. ബംഗാൾ ഉൾക്കടലിൽ രൂപംകൊണ്ട ന്യൂനമർദമാണ്​ തമിഴ്​നാട്ടിലെ കനത്ത മഴക്കുള്ള കാരണം.

കനത്തമഴയുണ്ടാകുമെന്ന പ്രവചനത്തെ തുടർന്ന്​ തമിഴ്​നാട്ടിലെ 20 ജില്ലകളിൽ റെഡ്​അലർട്ട്​ പ്രഖ്യാപിച്ചിട്ടുണ്ട്​. ആറ്​ ജില്ലകളിൽ പ്രളയ മുന്നറിയിപ്പ്​ നൽകി. തൂത്തുക്കുടി, വില്ലുപുരം, തിരുന്നൽവേലി, നാഗപട്ടണം, കൂടല്ലൂർ, ചെങ്കൽപേട്ട്​ ജില്ലകളിലാണ്​ പ്രളയമുന്നറിയിപ്പ്​ നൽകിയത്​.

ചെന്നൈയിലേക്ക്​ വരുന്നതും ​ പുറപ്പെടുന്നതുമായ എട്ട്​ വിമാനങ്ങൾ റദ്ദാക്കി. ഒമ്പത്​ ജില്ലകളിൽ ഇന്നും സ്​കൂളുകൾക്ക്​ അവധിയായിരിക്കും. തമിഴ്​നാട്ടിൽ ദിവസങ്ങളായി തുടരുന്ന കനത്ത മഴയിൽ ഇതുവരെ അഞ്ച്​ പേർ മരിച്ചിട്ടുണ്ട്​. 530 വീടുകൾക്ക്​ കേടുപാടുണ്ടായി. 1700 പേർ ദുരിതാശ്വാസ ക്യാമ്പുകളിലേക്ക്​ മാറുകയും ചെയ്​തിട്ടുണ്ട്​.