കോവിഡ്​ സമ്മർദ്ദം അകറ്റാൻ ചോക്ലേറ്റ്​ കഴിക്കണമെന്ന്​ കേന്ദ്ര ആരോഗ്യമന്ത്രി; തെളിവ്​ എവിടെയെന്ന്​​ വിദഗ്​ധർ

ന്യൂഡൽഹി: 70 ശതമാനം ​െകക്കോ അടങ്ങിയ ഡാർക്ക്​ ചോക്ലേറ്റ്​ കഴിച്ചാൽ കോവിഡുമായി ബന്ധപ്പെട്ട സമ്മർദ്ദം അകറ്റാമെന്ന കേന്ദ്ര ആരോഗ്യമന്ത്രി ഹർഷവർധന്‍റെ അവകാശവാദത്തിനെതിരെ വിദഗ്​ധർ രംഗത്തെത്തി.

വർധന്‍റെ പ്രസ്​താവനക്കെതിരെ ലാൻസെറ്റ്​ മെഡിക്കൽ ജേണൽ അവരുടെ ശനിയാഴ്ചത്തെ എഡിറ്റോറിയലിലൂടെ പ്രതികരിച്ചു. കോവിഡ്​ സാഹചര്യത്തിൽ എന്താണ്​ ഇതിന്​ തെളിവെന്ന്​​ ഗവേഷകനായ ആനന്ദ്​ ഭാൻ ചോദിച്ചു. 'എത്രപേർക്ക് ഡാർക്ക്​ ചോക്ലേറ്റുകൾ വാങ്ങാൻ കഴിയും' -മന്ത്രി തെളിവുകൾ അടിസ്ഥാനമാക്കിയുള്ള പ്രസ്താവനകൾ നടത്തണമെന്ന് ആവശ്യപ്പെട്ട് ഭാൻ പറഞ്ഞു.

ട്വിറ്ററിലൂടെയാണ്​ പ്രതിരോധശേഷി വർധിപ്പിക്കുന്നതിനും സമ്മർദ്ദം കുറയ്ക്കുന്നതിനുമായി ഡാർക്ക് ചോക്ലേറ്റ് ഉൾപ്പെടെയുള്ള ഭക്ഷണപദാർഥങ്ങൾ കഴിക്കാൻ വർധൻ നിർദേശിച്ചത്​.

ശരീരത്തിൽ വിറ്റാമിനും ധാതുക്കളും വർധിപ്പിക്കുന്നതിന് പച്ചക്കറികളും പഴങ്ങളും കഴിക്കാനും അദ്ദേഹം ആവശ്യപ്പെട്ടു. ഡാർക്ക്​ ചോക്ലേറ്റ്​ കഴിക്കാനുള്ള മന്ത്രിയുടെ ആഹ്വാനത്തെ പൊതുവിതരണ സംവിധാനം മാറ്റിയോ എന്ന്​ പരിഹസിച്ചാണ്​ ട്വിറ്ററാറ്റികൾ നേരിട്ടത്​.