അദ്ദേഹം സ്വന്തം കടമ നിർവഹിക്കുക മാത്രമാണ്​ ചെയ്​തത്​; ലഖിംപൂർ ഖേരിയിൽ കൊല്ലപ്പെട്ട മാധ്യമപ്രവർത്തകന്‍റെ പിതാവ്​

ലഖ്​നോ: ഉത്തർപ്രദേശിലെ ലഖിംപൂർ ഖേരിയിൽ നടന്ന സംഘർഷത്തിൽ നാലു കർഷകരും പ്രദേശിക മാധ്യമപ്രവർത്തകനും ഉൾപ്പെടെ ഒമ്പതുപേരാണ്​ കൊല്ലപ്പെട്ടത്​. പ്രദേശിക ചാനലി​ൽ ജോലിചെയ്യുന്ന 35കാരനായ രമൻ കശ്യപാണ്​ കൊല്ലപ്പെട്ട മാധ്യമപ്രവർത്തകൻ. കർഷകർക്കൊപ്പം രമനും കാറിനടിയിൽ അകപ്പെടുകയായിരുന്നുവെന്നാണ്​ വിവരം. എന്നാൽ രമന്‍റെ മരണത്തിൽ കുടുംബം രംഗത്തെത്തിയിരിക്കുകയാണ്​ ഇപ്പോൾ.

അക്രമ സംഭവത്തിന്​ മണിക്കൂറുകൾക്ക്​ ശേഷമാണ്​ രമന്‍റെ മൃതദേഹം കണ്ടുകിട്ടിയത്​. സംഭവ സമയത്ത്​ മകനെ കാണാനില്ലായിരുന്നുവെന്നും പിതാവ്​ രാം ധുലരി എൻ.ഡി.ടി​.വിയോട്​ പറഞ്ഞു.

'അദ്ദേഹം മാധ്യമപ്രവർത്തന ജോലിക്കായാണ്​ അവിടെയെത്തിയത്​. വെളുപ്പിന്​ മൂന്നുമണിക്ക്​ അജ്ഞാത മൃതദേഹം സംബന്ധിച്ച വിവരം ലഭിച്ചു. ഞാൻ മോർച്ചറിയിലെത്തിയപ്പോൾ എന്‍റെ മകനെയാണ്​ കാണുന്നത്​' -രാം പറയുന്നു. ഇരുവശത്തുനിന്നും വന്ന പ്രക്ഷോഭങ്ങൾക്കിടയിൽ മകൻ കുടുങ്ങിപോയതാണെന്നും അദ്ദേഹം ആരോപിച്ചു.

അതേസമയം രമൻ കാർ പാഞ്ഞുകയറിയതിനെ തുടർന്നല്ല മരിച്ചതെന്നും സംഘർഷത്തിനിടെയാണെന്നും സഹപ്രവർത്തകർ ആരോപിച്ചു. രമന്​ രണ്ടുമക്കളുണ്ടെന്നും ഇവർക്ക്​ 50ലക്ഷം രൂപ ധനസഹായം നൽകണമെന്നും ഭാര്യക്ക്​ സർക്കാർ ജോലി നൽകണമെന്നും രാം പറഞ്ഞു.