ഇന്ത്യയെ നാണംകെടുത്താൻ രാകേഷ്​ ടികായത്ത്​ കരാർ എടുത്തിട്ടുണ്ടോ​? -ബി.ജെ.പി നേതാവ്​

ന്യൂഡൽഹി: കേന്ദ്രസർക്കാറിന്‍റെ കാർഷിക നിയമങ്ങൾക്കെതിരെ പ്രക്ഷോഭം തുടരുന്ന ഭാരതീയ കിസാൻ യൂനിയൻ നേതാവ്​ രാകേഷ്​ ടികായത്തിന്‍റെ യു.എൻ പരാമർശത്തിൽ വിമർശനവുമായി ബി.ജെ.പി നേതാവ്​. രാജ്യത്തെ നാണം കെടുത്താൻ ടികായത്ത്​ കരാർ എടുത്തി​ട്ടുണ്ടോയെന്ന്​ ചോദിക്കുകയും വാക്കുകൾ സൂക്ഷിച്ച്​ പ്രയോഗിക്കണമെന്ന്​ മുന്നറിയിപ്പ്​ നൽകുകയുമായിരുന്നു ബി.ജെ.പി കിസാൻ മോർച്ച പ്രസിഡന്‍റ്​ രാജ്​കുമാർ ചഹർ.

ടികായത്ത്​ വാക്കുകൾ പ്രയോഗിക്കു​േമ്പാൾ അതിന്‍റെ പരിണിതഫലം മനസിലാക്കണം. അദ്ദേഹം ഇന്ത്യയെ നാണം കെടുത്താൻ എന്തെങ്കിലും കരാർ ഏറ്റെടുത്തിട്ടു​േണ്ടാ​​? അദ്ദേഹം വാക്കുകൾ സൂക്ഷിച്ച്​ ​പ്രയോഗിക്കുകയും അതിന്‍റെ പരിണിത ഫലങ്ങ​െളക്കുറിച്ച്​ ചിന്തിക്കുകയും വേണം. പ്രയോഗങ്ങൾക്ക്​ ശേഷം അദ്ദേഹം അതിൽ വ്യക്തത നൽകും. കർഷക പ്രക്ഷോഭം എന്നുവിളിക്കുന്ന പ്രതിഷേധം ആരംഭിച്ചതിന്​ ​ശേഷം, എല്ലാ പ്രസ്​താവനകൾക്ക്​ ശേഷവും അദ്ദേഹം വിശദീകരണം നൽകി. ഇത്​ എത്രനാൾ തുടരും?' -രാജ്​കുമാർ ചോദിച്ചു.

കർഷകരുടെ താൽപര്യങ്ങൾ സംരക്ഷിക്കാൻ ടികായത്ത്​ ഒന്നും ചെയ്​തില്ലെന്നും അദ്ദേഹം ആരോപിച്ചു. ടികായത്ത്​ ഉൾപ്പെടെയുള്ളവർ കർഷകരുടെ താൽപര്യ സംരക്ഷണമെന്ന പേരിൽ രാഷ്​ട്രീയം കളിക്കുന്നു. കാർഷിക മേഖലയെ ഉയർത്തി​െ​ക്കാണ്ടുവരുന്നതിന്​ സ്വാതന്ത്ര്യസമരത്തിന്​ ശേഷം നടക്കുന്ന ഏറ്റവും ​വലിയ മാറ്റങ്ങളിലൊന്നാണ്​ കാർഷിക നിയമങ്ങളെന്നും രാജ്​കുമാർ പറഞ്ഞു.

റിപ്പബ്ലിക്​ ദിനത്തിലെ സംഘർഷവുമായി ബന്ധപ്പെട്ട ടികായത്തിന്‍റെ പ്രതികരണമാണ്​ രാജ്​കുമാറിനെ ചൊടിപ്പിച്ചത്​. റിപ്പബ്ലിക്​ ദിനത്തിലെ ട്രാക്​ടർ റാലിയുമായി ബന്ധപ്പെട്ട അക്രമ സംഭവങ്ങൾ അന്വേഷിക്കാൻ നിഷ്​പക്ഷമായ അന്വേഷണ ഏജൻസിയുണ്ടോയെന്നും അല്ലെങ്കിൽ ഇക്കാര്യം യു.എന്നിൽ ഉന്നയിക്കണോ എന്നായിരുന്നു ടികായത്തിന്‍റെ പ്രതികരണം.