ഹരിയാന കൂട്ടബലാത്സംഗം: സൈനികൻ ഉൾ​​െപ്പടെ രണ്ടു​പേർ പിടിയിൽ

ചണ്ഡീഗഢ്: ഹരിയാനയില്‍ പത്തൊമ്പതുകാരി കൂട്ടബലാത്സംഗത്തിനിരയായ കേസിൽ ഒളിവിലായിരുന്ന രണ്ട്​ മുഖ്യപ്രതികളെ പൊലീസ്​ അറസ്​റ്റു​ചെയ്​തു. സൈനികനായ പങ്കജ്, കൂട്ടാളി മനീഷ് എന്നിവരെയാണ് മഹേന്ദ്രഗഢ് ജില്ലയിലെ സത്‌നാളിയില്‍നിന്ന്​ ഞായറാഴ്ച പ്രത്യേക അന്വേഷണസംഘം പിടികൂടിയത്.

സെപ്റ്റംബര്‍ 12ന്​ നടന്ന സംഭവത്തിൽ പ്രതിയായ നിഷുവിനെ ഇൗമാസം 16നു​തന്നെ പൊലീസ്​ പിടികൂടിയിരുന്നു. ബലാത്സംഗശേഷം പെൺകുട്ടിയെ പരിശോധിച്ച ഡോക്​ടർ സഞ്​ജീവ്​, അതിക്രമം നടന്ന സ്​ഥലത്തി​​​െൻറ ഉടമ ദീനദയാൽ എന്നിവർ കോടതി ഉത്തരവു​പ്രകാരം ജുഡീഷ്യൽ കസ്​റ്റഡിയിലാണ്​. ഇതോടെ കേസിലെ എല്ലാ പ്രതികളും പിടിയിലായെന്ന് ഹരിയാന ഡി.ജി.പി ബി.എസ്.സന്ധു പറഞ്ഞു.

സൈനികനായ പങ്കജ്, കൂട്ടാളികളായ മനീഷ്, നിഷു എന്നിവർ പെണ്‍കുട്ടിക്ക്​ മയക്കുമരുന്നുചേർത്ത പാനീയം നൽകി തട്ടിക്കൊണ്ടുപോയി കൂട്ടബലാത്സംഗത്തിന് ഇരയാക്കുകയായിരുന്നു. നര്‍നോള്‍ മേഖലയില്‍നിന്നായിരുന്നു ഇവര്‍ പെണ്‍കുട്ടിയെ തട്ടിക്കൊണ്ടു പോയത്. സംഭവം വന്‍പ്രതിഷേധങ്ങള്‍ക്ക് വഴി​െവച്ചതോടെ സ്ത്രീസുരക്ഷ ഉറപ്പാക്കുന്നതില്‍ സര്‍ക്കാര്‍ പരാജയപ്പെട്ടെന്ന്​ ആരോപിച്ച്​ പ്രതിപക്ഷവും രംഗത്തുവരുകയും സംസ്​ഥാനത്ത്​ രാഷ്​ടപ്രതിഭരണം ആവശ്യപ്പെടുകയും ചെയ്​തിരുന്നു.