ഹരിദ്വാർ വിദ്വേഷ പ്രസംഗം ഭരണഘടനയുടെ ലംഘനം, നടപടി സ്വീകരിക്കണം -പ്രിയങ്ക ഗാന്ധി

ന്യൂഡൽഹി: ഉത്തരാഖണ്ഡ്​ ഹരിദ്വാറിലെ ധർമ സൻസദ്​ എന്ന സന്യാസി സമ്മേളനത്തിലെ വിദ്വേഷ പ്രസംഗങ്ങളോട്​ രൂക്ഷമായി പ്രതികരിച്ച്​ കോൺഗ്രസ്​ നേതാവ്​ പ്രിയങ്ക ഗാന്ധി. കലാപത്തിന്​ ആഹ്വാനം ചെയ്യുന്നവർക്കെതിരെ കർശന നടപടിയെടുക്കണമെന്നും ഇത്തരം ​പ്രവൃത്തികൾ ഭരണഘടനയുടെയും നിയമത്തിന്‍റെയും ലംഘനമാണെന്നും അവർ പറഞ്ഞു.

'ഇത്തരത്തിലുള്ള വിദ്വേഷവും അക്രമവും പ്രോത്സാഹിപ്പിക്കുന്നവർക്കെതിരെ കർശന നടപടിയെടുക്കണം. നമ്മുടെ മുൻ പ്രധാനമന്ത്രിയെയും വിവിധ സമുദായങ്ങളിൽപ്പെട്ടവർക്കെതിരെയും അക്രമം അഴിച്ചുവിടാൻ ആഹ്വാനം ചെയ്ത അവർ രക്ഷപ്പെടുന്നത്​ നിന്ദ്യമാണ്​. ഇത്തരം പ്രവൃത്തികൾ നമ്മുടെ ഭരണഘടനയെയും നിയമത്തെയും വെല്ലുവിളിക്കുന്നതാണ്​' -പ്രിയങ്ക ഗാന്ധി ട്വീറ്റ്​ ചെയ്തു.

നിരവധി പ്രതിപക്ഷ നേതാക്കളാണ്​ വിദ്വേഷ പ്രസംഗത്തിനെതിരെ രംഗത്തെത്തിയത്​. വിദ്വേഷ പ്രസംഗത്തിനെതിരെ തൃണമൂൽ കോൺഗ്രസ്​ ദേശീയ വക്താവ്​ സകേത്​ ഗോഖലെ ധർമ സൻസദ്​ സംഘടിപ്പിച്ചവർക്കെതിരെയും പ്രസംഗിച്ചവർക്കെതിരെയും നടപടി സ്വീകരിക്കണമെന്ന ആവശ്യവുമായി രംഗത്തെത്തിയിരുന്നു. കൂടാതെ ജ്വാലപൂർ പൊലീസ്​ സ്​​റ്റേഷനിൽ പരാതി നൽകുകയും ചെയ്തു.

ഡിസംബർ 17 മുതൽ 19 വരെയായിരുന്നു വിവാദ സമ്മേളനം. ധർമ സൻസദിൽ രാജ്യത്തെ മുസ്​ലിംകൾക്കെതിരെയായിരുന്നു പരസ്യമായ കൊലവിളിയും വിദ്വേഷ പ്രസംഗവും. ന്യൂനപക്ഷങ്ങളെ കൊല്ലാനും അവരുടെ ആരാധനാ കേന്ദ്രങ്ങൾ ആക്രമിക്കാനും ചടങ്ങിൽ പ്രസംഗിച്ചവർ ആഹ്വാനം ചെയ്തിരുന്നു.