വയറുവേദനയുമായി വന്ന അഞ്ചുവയസുകാരിയെ പരിശോധിച്ച ഡോക്​ടർമാർ കണ്ടത്​ അമ്പരപ്പിക്കുന്ന കാഴ്​ച്ച

ചണ്ഡിഗഡ്: കടുത്ത വയറുവേദനയും വിശപ്പില്ലായ്​മയും കാരണം ആശുപത്രിയിലെത്തിയ അഞ്ചുവയസുകാരിയെ പരിശോധിച്ച ഡോക്​ടർമാർ കണ്ടത്​ അമ്പരപ്പിക്കുന്ന കാഴ്​ച്ച. സ്​കാനിങ്ങിനിടെ കുട്ടിയുടെ വയറിനുള്ളിൽ മുടിയുടെ വലിയ ശേഖരം കണ്ടെത്തുകയായിരുന്നു. തുടർന്ന്​ നടത്തിയ ശസ്​ത്രക്രിയയിൽ ഒന്നര കിലോ വരുന്ന മുടിയുടെ വലിയ ഉരുള ഡോക്​ടർമാർ നീക്കം ചെയ്​തു. ചണ്ഡിഗഡിലെ മൗലി ജാഗ്രാനിലാന്​ സംഭവം.

പഞ്ചകുളയിലെ സിവിൽ ഹോസ്​പിറ്റലിൽ ഡോ. വിവേക് ഭാദുവി​െൻറ നേതൃത്വത്തിലുള്ള സംഘമാണ് ശസ്ത്രക്രിയ നടത്തിയത്. കുട്ടിയെ സൂക്ഷ്മമായി നിരീക്ഷിക്കാനും സ്വന്തം മുടി മുറിച്ചുമാറ്റാനും മാതാപിതാക്കളോട് നിർദ്ദേശിച്ചിട്ടുണ്ടെന്നും ഡോക്ടർ പറഞ്ഞു. കുട്ടി ഇപ്പോഴും നിരീക്ഷണത്തിലാണ്.'ട്രൈക്കോബെസോർ'എന്ന്​​ വിളിക്കുന്ന അവസ്​ഥയാണ്​ കുട്ടിയിൽ കണ്ടതെന്ന്​ ഡോക്​ടർ വിവേക് പറഞ്ഞു. ദഹനനാളത്തിനുള്ളിൽ മുടി അടിഞ്ഞുകൂടുന്നതുകാരണം ആമാശയത്തിന്​ വീക്കം, വേദന, വിശപ്പ് കുറയൽ എന്നിവ ഉണ്ടാവും. വയറുവേദന കാരണം പെൺകുട്ടിയുടെ മാതാപിതാക്കൾ ഒരാഴ്​ചമുമ്പ്​ തന്നെ സന്ദർശിക്കുകയായിരുന്നുവെന്നും അദ്ദേഹം കൂട്ടിച്ചേർത്തു.

രണ്ടര വർഷമായി കുട്ടി മുടി കഴിക്കുകയായിരുന്നുവെന്നാണ്​ ഡോക്​ടർമാരുടെ നിഗമനം. 'ഈ അവസ്ഥ പ്രധാനമായും മാനസിക വിഭ്രാന്തി ബാധിച്ചവരിലോ കടുത്ത സമ്മർദ്ദം നേരിടുന്നവരിലോ ആണ്​ കാണുന്നത്​. കുട്ടികൾക്കിടയിൽ ഇത് വളരെ അപൂർവമാണ്. ഞാൻ 20 വർഷമായി ഇവിടെ ജോലിചെയ്യുന്നു. കുട്ടികൾക്കിടയിൽ ഇത്തരത്തിലുള്ള സംഭവം കാണുന്നത്​ ആദ്യമാണ്​​'-ഡോ. വിവേക്​ പറഞ്ഞു.

'മുടി ദഹിക്കാത്തതിനാൽ ദഹനവ്യവസ്ഥയിൽ ഇവ തങ്ങിനിൽക്കും. ഒരാൾ മുടി കഴിക്കുന്നത് തുടരുകയാണെങ്കിൽ, അത് ഒരു പന്ത്പോലെ ആകും. പോഷകാഹാരക്കുറവ്, വയർ വീക്കം, വേദന എന്നിവയിലേക്ക് ഇത്​ നയിക്കും'-അദ്ദേഹം പറഞ്ഞു.