ജിംനേഷ്യത്തിൽവെച്ച്​ പെൺകുട്ടിയെ പീഡിപ്പിച്ച ജിം പരിശീലകൻ അറസ്റ്റിൽ

ഹൈദരാബാദ്​: ജിംനേഷ്യത്തിൽവെച്ച്​ പ്രായപൂർത്തിയാകാത്ത പെൺകുട്ടിയെ പീഡിപ്പിക്കുകയും പീഡനത്തിന്റെ ദൃശ്യങ്ങൾ പകർത്തുകയും മോർഫ് ചെയ്യുകയും ഭീഷണിപ്പെടുത്തി പണം തട്ടുകയും ചെയ്തതിന് ബോവൻപള്ളിയിൽ ജിം പരിശീലകൻ അറസ്റ്റിലായി. പെൺകുട്ടിയുടെ പരാതിയിൽ ജിം പരിശീലകനായ രാജുവിനെയാണ്​ പൊലീസ് അറസ്റ്റ് ചെയ്തത്​. പെൺകുട്ടി ജിമ്മിൽ വർക്ക് ഔട്ട് ചെയ്യുന്നതിനിടെ ദൃശ്യങ്ങൾ പകർത്തിയെന്നും ദൃശ്യങ്ങൾ ഉപയോഗിച്ച് ബ്ലാക്ക് മെയിൽ ചെയ്തുവെന്നുമാണ് ഇയാൾക്കെതിരെയുള്ള കുറ്റം.

സംഭവത്തെ തുടർന്ന്​ ഭയന്ന പെൺകുട്ടി രാജുവിന്​ ആദ്യം നാല് ലക്ഷം രൂപയും 20 പവൻ സ്വർണാഭരണങ്ങളും നൽകിയതായി പൊലീസ് പറഞ്ഞു. എന്നാൽ, ഇയാൾ പെൺകുട്ടിയെ ഭീഷണിപ്പെടുത്തുന്നത് തുടർന്നു. ശേഷം പെൺകുട്ടി ​പൊലീസിൽ പരാതിപ്പെടുകയായിരുന്നു. ഫിറ്റ്‌നസ് ആർ സോൺ ജിമ്മിൽ ഫിറ്റ്‌നസ് ട്രെയിനറായി ജോലി നോക്കുന്ന രാജുവാണ് പെൺകുട്ടിയെ ജിംനേഷ്യത്തിൽ വച്ച് പീഡിപ്പിച്ചത്. ഇയാൾക്കെതിരെ പൊലീസ് കേസെടുത്ത് കസ്റ്റഡിയിൽ വാങ്ങി.