ഓൺലൈൻ ക്ലാസിനിടെ ബി.ജെ.പി ഇന്ത്യയെ നശിപ്പിക്കു​ന്നുവെന്ന്​ പരാമർശം; അധ്യാപകനോട്​​ വിശദീകരണം തേടി

ന്യൂഡൽഹി: ഓൺലൈൻ ക്ലാസിനിടെ ബി.ജെ.പി ഇന്ത്യയെ നശിപ്പിക്കുകയാണെന്ന പരാമർശത്തിൽ അധ്യാപകനോട്​​​ വിശദീകരണം തേടി. ഗുരുഗ്രാമിലെ ഇന്‍റർനാഷണൽ സ്​കൂൾ അധ്യാപകനോട്​​​ പ്രധാനാധ്യാപകനാണ്​ വിശദീകരണം തേടിയത്​. രക്ഷിതാക്കളുടെ പരാതിയുടെ അടിസ്ഥാനത്തിലാണ്​ നടപടി​.

സെക്​ടർ 10ലെ യുറോ ഇന്‍റർനാഷണൽ സ്​കൂൾ അധ്യാപകനായ സോവ ദാസാണ്​ ബി.ജെ.പി സർക്കാറിനെതിരെ പരാമർശം നടത്തിയത്​. ബി.ജെ.പി സർക്കാർ രാജ്യത്തെ നശിപ്പിക്കുകയാണെന്നും അത്​ നിങ്ങൾക്ക്​ ഇപ്പോൾ മനസിലാകില്ലെന്നും പിന്നീട്​ വ്യക്​തമാകുമെന്നായിരുന്നു അധ്യാപകന്‍റെ പരാമർശം.

പൗരത്വ ഭേദഗതി നിയമത്തെ കുറിച്ചും അധ്യാപകൻ പ്രസ്​താവന നടത്തിയിരുന്നു. തുടർന്ന്​ അ​ധ്യാപകന്‍റെ ഓൺലൈൻ ക്ലാസുകളുടെ വിഡിയോ വ്യാപകമായി പ്രചരിക്കുകയും ചെയ്​തിരുന്നു. അധ്യാപകന്‍റെ പരാമർശങ്ങളിൽ രക്ഷിതാക്കൾ പരാതി നൽകിയതോടെയാണ്​ വിശദീകരണം തേടാൻ സ്​കൂൾ പ്രിൻസിപ്പാൾ തീരുമാനിച്ചത്​.