പട്ടാളക്കാരനെ തലങ്ങും വിലങ്ങും തല്ലിയ വനിത ഒടുവിൽ അറസ്​റ്റിൽ

ന്യൂഡൽഹി: പട്ടാളക്കാരനെ കാരണമില്ലാതെ ത​ല്ലിയ സംഭവത്തിൽ വനിത അറസ്​റ്റിൽ. സൗത്ത്​ ഡൽഹി വസന്ത്​ കുഞ്ചിലെ  44കാരിയായ സ്​മൃതി കലാറയാണ്​ പട്ടാളക്കാരനെ മർദിച്ചത്​. ഇതി​​െൻറ വീഡിയോ സാമൂഹിക മാധ്യമങ്ങളിൽ വൈറലായിരുന്നു. തുടർന്ന്​ സൈന്യം നൽകിയ പരാതിയുടെ അടിസ്ഥാനത്തിൽ സ്​മൃതിയെ ഡൽഹി പൊലീസ്​ അറസ്​റ്റ്​ ചെയ്യുകയായിരുന്നു. സ്​മൃതിയെ പിന്നീട്​ ജാമ്യത്തിൽ വിട്ടു.

പട്ടാളക്കാരുമായി നീങ്ങിയ ട്രക്കിന്​ മുന്നിൽ കാർ നിർത്തിയതിന്​ ശേഷം പുറത്തിറങ്ങി കാരണമില്ലാതെ സ്​മൃതി സൈനികനെ മർദ്ദിക്കുകയായിരുന്നു. ട്രക്ക്​ കാറിലിടിക്കുകയോ മറ്റ്​ തരത്തിലുള്ള പ്രകോപനങ്ങളോ ഇല്ലാതെയായിരുന്നു ഇവരുടെ മർദ്ദനം. എന്തിനാണ്​ മർദ്ദിക്കുന്നതെന്ന്​ പട്ടാളക്കാരൻ ചോദിച്ചുവെങ്കിലും കാരണം വ്യക്​തമാക്കാതെ സ്​മൃതി മർദ്ദനം തുടരുകയായിരുന്നു.

പൊതുസ്ഥലത്ത്​ വെച്ച്​  സർക്കാർ സേവകനായ ഒരാളെ മർദ്ദിച്ചതിനും അപമാനിച്ചതിനുമാണ്​ സ്​മൃതിക്കെതിരെ കേസെടുത്തിരിക്കുന്നത്​. സംഭവത്തിന്​ ശേഷം ഇവരുടെ കാർ പൊലീസ്​ കസ്​റ്റ്​ഡിയിലെടുത്തു.