പ്രണയപ്പക: ഗുജറാത്തിൽ പെൺകുട്ടിയെ 34 തവണ കുത്തി കൊലപ്പെടുത്തിയ പ്രതിക്ക്​ വധശിക്ഷ

പ്രായപൂർത്തിയാകാത്ത പെൺകുട്ടിയെ 34 തവണ കത്തിക്ക്​ കുത്തി കൊലപ്പെടുത്തിയ പ്രതിക്ക്​ വധശിക്ഷ. ഗുജറാത്ത്​ രാജ്​കോട്ട്​ അഡീഷനൽ ഡിസ്​ട്രിക്ട്​ ആൻഡ്​ സെഷൻസ്​ കോടതി ജഡ്ജി ആർ.ആർ ചൗധരിയാണ്​ വധശിക്ഷ വിധിച്ചത്​. ജയേഷ്​ സർവയ്യ എന്ന 26കാരനാണ്​ പ്രതി. ജയേഷ്​ പ്ലസ്​ വണിന്​ പഠിക്കുന്ന പെൺകുട്ടിയോട്​ പ്രണയാഭ്യത്ഥന നടത്തി. പെൺകുട്ടി ഇത്​ നിരസിച്ചതാണ്​​ കൊലപാതകത്തിൽ കലാശിച്ചത്​. 2021 മാർച്ചിലാണ്​ കൊലപാതകം. പെൺകുട്ടിയെ ജയേഷിൽനിന്ന്​ രക്ഷപെടുത്താൻ ശ്രമിച്ച സഹോദരനും കുത്തേറ്റു.

നിർഭയ കൊലപാതകത്തിന്​ സമാനമായ അപൂർവങ്ങളിൽ അപൂർവമായ കൊലപാതകമാണെന്ന്​ കോടതി വിലയിരുത്തി. പോക്​സോ കേസ്​ അടക്കം പ്രതിക്കെതിരെ ചുമത്തിയിരുന്നു. ജത്​പൂർ ജതൽസാർ ഗ്രാമത്തിലാണ്​ പെൺകുട്ടിയുടെയും പ്രതിയുടെയും വീട്​. 2021 മാർച്ച്​ 16ന്​ ജയേഷ്​ വിവാഹാഭ്യർത്ഥനയുമായി പെൺകുട്ടിയുടെ വീട്ടിലെത്തി. പെൺകുട്ടി ഇത്​ നിരസിച്ചു. തുടർന്ന്​ കുത്തി കൊലപ്പെടുത്തുകയായിരുന്നു. പ്രതിക്ക്​ 5000 രൂപ പിഴയും ചുമത്തിയിട്ടുണ്ട്​.