അനധികൃതമായി യു.എസിലേക്ക് കടക്കാൻ ശ്രമിക്കുന്നതിനിടെ ഇന്ത്യൻ യുവാവ് മരിച്ചു

ഗാന്ധിനഗർ: മെക്‌സിക്കോയിൽ നിന്ന് അനധികൃതമായി അമേരിക്കയിലേക്ക് കടക്കാനുള്ള ശ്രമത്തിനിടെ ഇന്ത്യൻ പൗരൻ മരിച്ചു. അതിർത്തി മതിൽ കയറുന്നതിനിടെയാണ് അപകടമുണ്ടായത്. ഗുജറാത്ത് സ്വദേശിയായ ബ്രിജ്കുമാർ യാദവാണ് മരിച്ചത്.

മനുഷ്യക്കടത്തിൽ ഏഴ് പേർക്കെതിരെ കേസെടുത്തതായും അതിൽ രണ്ട് പേരെ അറസ്റ്റ് ചെയ്തെന്നും ഗുജറാത്ത് പൊലീസ് അറിയിച്ചു. അഹമ്മദാബാദിൽ നിന്നുള്ള ഒരാളും ഗാന്ധിനഗറിൽ നിന്നുള്ള മറ്റൊരാളുമാണ് അറസ്റ്റിലായത്.

ബ്രിജ്കുമാർ യാദവിൽ നിന്ന് പണം വാങ്ങി ഏഴ് പേർ ചേർന്ന് അദ്ദേഹത്തെയും കുടുംബത്തെയും അനധികൃതമായി യു.എസിലേക്ക് അയക്കാൻ ശ്രമിച്ചു. എന്നാൽ യു.എസിൽ പ്രവേശിക്കുന്നതിലെ അപകടസാധ്യതകളെക്കുറിച്ച് അവർ അദ്ദേഹത്തെ അറിയിച്ചിരുന്നില്ലെന്നും പൊലീസ് വ്യക്തമാക്കി.

2022 നവംബർ 11 നാണ് കുടുംബത്തെ മുംബൈയിലേക്ക് കൊണ്ടുപോയത്. അവിടെ നിന്ന് ഇസ്താംബൂളിലേക്കും പിന്നീട് മെക്സിക്കോയിലുമെത്തിച്ചു. 2022 ഡിസംബർ 21 ന് അതിർത്തി മതിൽ കടക്കാനുള്ള ശ്രമത്തിനിടെ യാദവ് വീണ് മരിക്കുകയായിരുന്നു. സംഭവത്തിൽ ഭാര്യക്കും മൂന്ന് വയസുള്ള മകനും ഗുരുതരമായി പരിക്കേറ്റിരുന്നു. യാദവിന്റെ മരണത്തെ തുടർന്ന് കലോൽ പൊലീസ് പിന്നീട് മനുഷ്യക്കടത്തിന് കേസെടുത്തു.