ഡ്രാഗണല്ല, ഇനി 'കമലം'; പേരുമാറ്റി ഗുജറാത്ത്​ സർക്കാർ

അഹ്​മദാബാദ്​: ​ഡ്രാഗൺ ഫ്രൂട്ടിന്‍റെ പേരുമാറ്റി ഗുജറാത്ത്​ സർക്കാർ. 'കമലം' എന്നാണ്​ പുതിയ പേര്​. ഡ്രാഗൺ എന്ന പേര്​ ഒരു ഫലത്തിന്​ ചേരില്ലെന്നും അതിനാലാണ്​ പേരുമാറ്റമെന്നും ഗുജറാത്ത്​ മുഖ്യമന്ത്രി വിജയ്​ രൂപാണി പറഞ്ഞു.

ഡ്രാഗൺ ഫ്രൂട്ടിന്‍റെ രൂപം താമരപ്പൂവിനെപ്പോലെയാണ്​. അതിനാലാണ്​ താമര അർഥം വരുന്ന കമലം എന്ന്​ പേരിട്ടതെന്നും ​അദ്ദേഹം കൂട്ടിച്ചേർത്തു.

കുറച്ചു വർഷങ്ങളായി ഗുജറാത്തിൽ ഡ്രാഗൺ ഫ്രൂട്ട്​ വലിയ തോതിൽ കൃഷിചെയ്​തുവരുന്നുണ്ട്​. ഗുജറാത്തിലെ കച്ച്​, നവസരി പ്രദേശങ്ങളിലാണ്​ കൃഷി വ്യാപകം.

കൂടാതെ ഗുജറാത്തിലെ ബി.ജെ.പി ഓഫിസിന്‍റെ പേരും കമലം എന്നാണ്​. സംസ്​ഥാന സർക്കാർ പേരിന്​ പേറ്റന്‍റ്​ ലഭിക്കാൻ അപേക്ഷ നൽകിയിട്ടുണ്ട്​. പേരുമാറ്റത്തിന്​ പിന്നിൽ രാഷ്​ട്രീയമില്ലെന്നും അദ്ദേഹം പറഞ്ഞു.