ഹിന്ദു പെൺകുട്ടികളെ 'കെണി'യിൽപെടുത്തുന്നവർക്കെതിരെ ഗുജറാത്ത്​ മുഖ്യമന്ത്രിയുടെ മുന്നറിയിപ്പ്​

അഹ്​മദാബാദ്​: ഹൈന്ദവ പെൺകുട്ടികളെ 'കെണി'യിൽ പെടുത്തി ഒളിച്ചോടുന്നവർക്ക്​ മുന്നറിയിപ്പുമായി ഗുജറാത്ത്​ മുഖ്യമന്ത്രി വിജയ്​ രൂപാണി.

ഗോവധത്തിനെതിരെയും സർക്കാർ ശക്​തമായ നടപടികൾ സ്വീകരിച്ചതായി അഹ്​മദാബദിലെ വൈഷ്​ണോദേവിയിലെ മൽദാരി സമുദായത്തി​നെ അഭിമുഖീകരിച്ച്​ സംസാരിക്കവേ വിജയ്​ രൂപാണി പറഞ്ഞു. കാലിവളർത്തുകാരാണ്​ മൽദാരി സമുദായം.

'എന്‍റെ സർക്കാർ കർശനമായ വ്യവസ്ഥകളോടെ നിരവധി നിയമങ്ങൾ കൊണ്ടുവന്നു. പശുക്കളെ കശാപ്പിൽ നിന്ന് രക്ഷിക്കാനുള്ള നിയമം, ഭൂമി കൈയേറ്റം തടയാനുള്ള നിയമം, മാല പൊട്ടിക്കൽ തടയാനുള്ള നിയമമോ ആകട്ടെ' -അദ്ദേഹം പറഞ്ഞു.

'ലവ്​ ജിഹാദ്​' തടയാൻ ഞങ്ങൾ ഒരു നിയമം കൊണ്ടുവന്നു. ഹിന്ദു പെൺകുട്ടികളെ കെണിയിൽ പെടുത്തി അവരുമായി ഒളിച്ചോടുന്നവരോട് ഞങ്ങൾ കർശനമായി ഇടപെടുന്നു' -വിജയ്​ രൂപാണി പറഞ്ഞു.

ഈ വർഷം ഏപ്രിലിലാണ് ഗുജറാത്ത് നിർബന്ധിത മതപരിവർത്തനം നടത്തി വിവാഹം ചെയ്യുന്നതിനെതിരെ നിയമം കൊണ്ടുവന്നത്. ഫ്രീഡം ഓഫ് റിലീജ്യസ് ആക്ട് 2003 ഭേദഗതിബില്ല് ഗുജറാത്ത് നിയമസഭ പാസാക്കുകയായിരുന്നു. വിവാഹത്തിന്‍റെ ഭാഗമായി മതപരിവർത്തനം നടത്തിയാൽ ഇനി നിർബന്ധിത മതപരിവർത്തന കുറ്റമായി പരിഗണിക്കും. മൂന്ന്​ മുതൽ 10 വർഷം വരെ കഠിന തടവും അഞ്ച്​ ലക്ഷം രൂപ പിഴയും ആണ് ശിക്ഷ.