You are here

പ്രണയ ബന്ധത്തിന്‍റെ പേരിൽ ഗുജറാത്തിൽ മുസ്​ലിം യുവാവിനെ മർദിച്ചു കൊന്നു

10:05 AM
28/07/2019
muslim youth beaten to death 28719.jpg

ഗാന്ധിനഗർ: ഗോത്രവിഭാഗക്കാരിയായ പെൺകുട്ടിയുമായുള്ള പ്രണയത്തിന്‍റെ പേരിൽ ഗുജറാത്തിൽ മുസ്​ലിം യുവാവിനെ മർദിച്ചു കൊന്നു. ഫായിസ് എന്ന 17കാരനാണ് കൊല്ലപ്പെട്ടത്. ജൂലൈ 24നാണ് സംഭവം. 

ക്രൂരമർദനത്തിനിരയായ ഫായിസിനെ പിതാവ് മുഹമ്മദ് സുൽത്താൻ റഹീം ഖുറൈശിയാണ് ആശുപത്രിയിലെത്തിച്ചത്. എന്നാൽ, രക്ഷിക്കാനായില്ല. മകനെ വീട്ടിലേക്ക് കൂട്ടിക്കൊണ്ടുപോകാൻ ബോറിദ്രയിലെത്തിയ റഹീം ഖുറൈശി ക്രൂരമർദനത്തിന് ശേഷം ഉപേക്ഷിക്കപ്പെട്ട നിലയിൽ ഫായിസിനെ കണ്ടെത്തുകയായിരുന്നു.

ഫായിസിന്‍റെ കൈയിലും കരളിനും സാരമായ പരിക്കേറ്റിരുന്നു. വാരിയെല്ലുകൾ തകർന്നിരുന്നു. മകനെ മർദിച്ചത് ആരാണെന്ന് തനിക്കറിയില്ല. കുറ്റവാളികളെ കണ്ടെത്തി ശിക്ഷ നൽകണം -റഹീം ഖുറൈശി പറഞ്ഞു. 

ഹിന്ദു- മുസ്​ലിം വിഭാഗങ്ങൾ തമ്മിലുള്ള പ്രശ്നമാണെന്ന് ആളുകൾ പറയുന്നു. എന്നാൽ, തന്‍റെ മകൻ തെറ്റൊന്നും ചെയ്തിട്ടില്ല. വെറും 17 വയസ് മാത്രമായിരുന്നു അവന് -ഫായിസിന്‍റെ മാതാവ് ഫർസാനാബാനു പറഞ്ഞു.

ഫായിസ് ബോറിദ്ര വില്ലേജിലെ ഗോത്രവിഭാഗക്കാരിയായ പെൺകുട്ടിയുമായി പ്രണയത്തിലായിരുന്നുവെന്നും ഇതിന്‍റെ പേരിലാണ് മർദനമെന്നും പൊലീസ് പറയുന്നു. 12 പേർ അടങ്ങുന്ന സംഘമാണ് വടിയും പൈപ്പുകളും ഉപയോഗിച്ച് ക്രൂരമായി മർദിച്ചത്. 

സംഭവത്തിൽ നാല് പേരെ പിടികൂടിയതായും മറ്റുള്ളവരെ ഉടൻ പിടികൂടുമെന്നും പൊലീസ് പറഞ്ഞു.
 

Loading...
COMMENTS