ബി.ജെ.പിയുമായുള്ള സഖ്യം നഷ്​ടക്കച്ചവടം, 'ഹിന്ദുത്വ' തമിഴ്​നാട്ടിൽ ചെലവാകില്ല; സഖ്യത്തിനെതിരെ​ എ.ഐ.എ.ഡി.എം.കെ നേതാക്കൾ രംഗത്ത്​

ചെന്നൈ: തദ്ദേശ തെരഞ്ഞെട​ുപ്പ്​ അടുത്തെത്തി നിൽക്കെ ബി.ജെ.പിയുമായുള്ള സഖ്യത്തെച്ചൊല്ലി എ.ഐ.എ.ഡി.എം.കെയിൽ കലഹം. പാർട്ടിയിൽ നേതാക്കളും അണികളും ഇക്കാര്യത്തിൽ രണ്ടു തട്ടിലാണി​േപ്പാൾ. ബി.ജെ.പി പുറത്തു നിന്നു​ള്ളവരാണെന്ന പ്രതിച്​ഛായക്കൊപ്പം തമിഴ്​നാട്ടിൽ വിലപ്പോവാത്ത 'ഹിന്ദുത്വ'യും ചേരു​േമ്പാൾ അവരുമായി സഖ്യത്തിലേർപ്പെടുന്നതിൽ കഴമ്പില്ലെന്നാണ്​ വലിയൊരു വിഭാഗം നേതാക്കളുടെയും പ്രവർത്തകരുടെയും വാദം. ബി.ജെ.പിയുമായി ചേരുന്നതോടെ ന്യൂനപക്ഷ സമുദായങ്ങളിൽനിന്ന്​ തീരെ പിന്തുണ കിട്ടുന്നില്ലെന്നതും അവർ ഉയർത്തിക്കാട്ടുന്നു.

ഒമ്പതു ജില്ലകളിലെ ഗ്രാമീണ തദ്ദേശ സ്​ഥാപനങ്ങളിലേക്കുള്ള തെരഞ്ഞെടുപ്പ്​ സെപ്​റ്റംബർ 15നകം നടത്തണമെന്ന്​ തമിഴ്​നാട്​ സ്​റ്റേറ്റ്​ ഇലക്​ഷൻ കമീഷന്​ സുപ്രീം കോടതി നിർദേശം നൽകിയിട്ടുണ്ട്​. ഇതുകൂടാതെ, നഗരപ്രദേശങ്ങളിലേക്കുള്ള തെരഞ്ഞെടുപ്പ്​ ഈ വർഷം അവസാനിക്കുന്നതിന്​മുമ്പ്​ നടത്തണമെന്നും കോടതി നിർദേശിച്ചു. പത്തു വർഷത്തെ ഇടവേളക്കുശേഷമാണ്​ നഗരങ്ങളിൽ തദ്ദേശ തെരഞ്ഞെടുപ്പിന്​ അരങ്ങൊരുങ്ങുന്നത്​.

തെരഞ്ഞെടുപ്പ്​ അടുത്തുനിൽക്കെ, ബി.ജെ.പിയുമായുള്ള സഖ്യം തുടരുമെന്ന്​ കാട്ടി എ.ഐ.എ.ഡി.എം.കെ ഒൗദ്യോഗിക വിശദീകരണക്കുറിപ്പ്​ ഇറക്കിയിട്ടുണ്ട്​. 'തദ്ദേശ തെരഞ്ഞെടുപ്പിൽ മികച്ച വിജയം നേടുകയെന്ന ലക്ഷ്യമിട്ട്​ എ.ഐ.എ.ഡി.എം.കെ-ബി.ജെ.പി സഖ്യം കൂട്ടായ ശ്രമം നടത്തും. എല്ലാ മണ്ഡലങ്ങളിലും മികച്ച വിജയമാണ്​ ഞങ്ങൾ പ്രതീക്ഷിക്കുന്നത്​' -മുതിർന്ന എ.ഐ.എ.ഡി.എം.കെ നേതാവും പാർട്ടി വക്​താവുമായ ആർ. വൈദ്യലിംഗം ഈയിടെ മാധ്യമങ്ങളോട്​ പറഞ്ഞതിങ്ങനെ.

എന്നാൽ, പാർട്ടിയിലെ ഭൂരിഭാഗം നേതാക്കളും ഈ അഭിപ്രായത്തി​െനതിരാണ്​. 'പുറത്തുനിന്നുള്ളവർ' എന്ന ഇമേജുള്ള ബി.ജെ.പിയുമായി കൂട്ടുകൂടുന്നത്​ എ.ഐ.എ.ഡി.എം.കെക്ക്​ ദോഷം ​െചയ്യുമെന്നാണ്​ അവരുടെ വിലയിരുത്തൽ. നിയമസഭാ തെരഞ്ഞെടുപ്പിൽ ബി.ജെ.പിയുമായി ചേർന്ന്​ മത്സരിച്ചപ്പോഴേറ്റ തിരിച്ചടി പാഠമായി എടുക്കണമെന്നും തദ്ദേശ തെര​െഞ്ഞടുപ്പിൽ അവരുമായി സഖ്യത്തിലേർപ്പെടാതെ മത്സരിക്കണമെന്നും അവർ ആവശ്യമുന്നയിക്കുന്നു. ഇക്കഴിഞ്ഞ നിയമസഭാ തെരഞ്ഞെടുപ്പിലാണ്​ ന്യൂനപക്ഷസമുദായങ്ങൾ ഇതാദ്യമായി എ.ഐ.എ.ഡി.എം.കെക്ക്​ വോട്ടു​െചയ്യാതിരുന്നതെന്നും അവർ ചൂണ്ടിക്കാട്ടുന്നു.

'ഞാൻ മാത്രമല്ല, എല്ലാവരും ഈ സഖ്യത്തിൽനിന്ന്​ പുറത്തുകടക്കണമെന്നും ബി.ജെ.പി ഇല്ലാതെ പോരാട്ടം തുടരണമെന്നുമുള്ള അഭിപ്രായക്കാരാണ്​. ബി.ജെ.പി തമിഴ്​നാട്ടിൽ ഡി.എം.കെയെ സുഖിപ്പിക്കുകയാണെന്നാണ്​ സൂചനകൾ. നിയമസഭയുടെ വാർഷികാഘോഷങ്ങളിൽനിന്ന്​ ഞങ്ങൾ വിട്ടുനിന്ന​േപ്പാൾ അവരതിൽ പ​ങ്കെടുത്തു. ഡി.എം.കെ തങ്ങളുടെ ശത്രുക്കളല്ലെന്നും എതിർ പാർട്ടി മാത്രമാണെന്നും മുൻതമിഴ്​നാട്​ ബി.​െജ.പി അധ്യക്ഷൻ എൽ. മുരുഗൻ പ്രസ്​താവിച്ചിരുന്നു' -പേരുവെളിപ്പെടുത്താത്ത മുതിർന്ന എ.ഐ.എ.ഡി.എം.കെ നേതാവ്​ 'ദ പ്രി​ന്‍റി'നോട്​ പറഞ്ഞു.

ബി.ജെ.പിയുമായി കൈ​േകാർക്കണമെന്ന്​ എ.ഐ.എ.ഡി.എം.കെയിൽ ആർക്കും താൽപര്യമില്ലാത്ത സാഹചര്യമാണ്​ ഇപ്പോഴുള്ളതെന്ന്​ മുൻ മന്ത്രി കൂടിയായ മറ്റൊരു നേതാവും മനസ്സുതുറന്നു. 'പാർട്ടി നേതാക്കളായ ഒ. പന്നീർശെൽവത്തെയും എടപ്പാടി പളനിസ്വാമിയെയും ഇക്കാര്യം ബോധ്യപ്പെടുത്തിയിട്ടുണ്ട്​. എന്നിട്ടും ഇപ്പോഴും ബി.ജെ.പിയുമായി കൂട്ടുകൂടുന്നത്​ എന്തുകൊണ്ടാണെന്ന്​ നിങ്ങൾ അവരോട്​ ചോദിക്കൂ..'

ബി.ജെ.പിയുമായി ചേരുന്നത്​ നഷ്​ടക്കച്ചവടമാണെന്ന ചിന്ത ക​ഴിഞ്ഞ നിയമസഭാ തെരഞ്ഞെടുപ്പിനുശേഷമാണ്​ നേതാക്കളിൽ ശക്​തമാകുന്നത്​. ബി.ജെ.പിയുമായി സഖ്യം ഇല്ലായിരുന്നെങ്കിൽ എ.ഐ.എ.ഡി.എം.കെക്ക്​ കഴിഞ്ഞ നിയമസഭ തെരഞ്ഞെടുപ്പിൽ മൂന്നിൽ രണ്ട്​ ഭൂരിപക്ഷം കിട്ടിയേനേയെന്ന്​ മുതിർന്ന നേതാവ്​ സി. പൊന്നയ്യൻ തുറന്നടിച്ചു. ബി.ജെ.പി തമിഴ്​ വിരുദ്ധരാണെന്ന കാഴ്ചപ്പാടാണ്​ സംസ്​ഥാനത്ത്​ ശക്​തമെന്നും 'ഹിന്ദു​ത്വ'ക്ക്​ തമിഴ്​നാട്ടിൽ വേരോട്ടം കിട്ടില്ലെന്നും അഞ്ചു പതിറ്റാണ്ടിലേറെയായി എ.ഐ.എ.ഡി.എം.കെയിൽ പ്രവർത്തിക്കുന്ന പൊന്നയ്യൻ അഭിപ്രായപ്പെടുന്നു. ബി.ജെ.പിയുമായി സഖ്യത്തി​േലർപ്പെട്ടതിലൂടെ എ.ഐ.എ.ഡി.എം.കെക്കൊപ്പം നിന്നിരുന്ന ഒ​േട്ടറെ ക്രിസ്​ത്യൻ, മുസ്​ലിം വോട്ടുകൾ നഷ്​ടപ്പെ​ട്ടെന്നും അദ്ദേഹം പറഞ്ഞു.

അതേസമയം, സഖ്യം തുടരുമോയെന്ന കാര്യത്തിൽ അന്തിമ തീരുമാനം തദ്ദേശതെരഞ്ഞെടുപ്പ്​ പ്രഖ്യാപനത്തിനുശേഷമാണ്​ ഉണ്ടാകുകയെന്ന്​ തമിഴ്​നാട്​ ബി.ജെ.പി വക്​താവ്​ നാരായണൻ തിരുപ്പതി പറഞ്ഞു. 'എ.ഐ.എ.ഡി.എം.കെയുടെ ഉചിതമായ ഫോറത്തിൽ അവർ തീരുമാനമെടുക്കും. സഖ്യത്തെച്ചൊല്ലിയുള്ള ഭിന്നാഭിപ്രായങ്ങൾ എല്ലാ കൂട്ടുകെട്ടിലുമുണ്ടാകും. അത്​ ബി.ജെ.പി-എ.ഐ.എ.ഡി.എം.കെ സഖ്യത്തിൽ മാത്രമുള്ളതല്ല' -തിരുപ്പതി ചൂണ്ടിക്കാട്ടി.