You are here

എസ്​.പി- ബി.എസ്​.പി സഖ്യം അഴിമതിക്കും അരാജകത്വത്തിനും വേണ്ടി- യോഗി ആദിത്യനാഥ്​ 

17:36 PM
12/01/2019

ന്യൂഡൽഹി: ലോക്​സഭാ തെരഞ്ഞെടുപ്പിൽ ബി.ജെ.പിയെ നേരിടാൻ രൂപംകൊണ്ട എസ്​.പി- ബി.എസ്​.പി സഖ്യത്തെ വിമർശിച്ച് യു.പി മുഖ്യമന്ത്രി യോഗി ആദിത്യനാഥ്​. പ്രതിപക്ഷ സഖ്യത്തിലൂടെ രാഷ്​ട്രീയ അസ്ഥിരതയും അരാജകത്വവും അഴിമതിയുമാണ്​ സംസ്ഥാനത്ത്​ ഉണ്ടാവുകയെന്ന്​ യോഗി പറഞ്ഞു. പരസ്​പരം വെറുത്ത്​​ കൊണ്ടിരുന്നവരാണ്​ മഹാസഖ്യത്തിനായി ഒരുമിച്ചിരിക്കുന്നത്​. അഴിമതിക്കും അരാജകത്വത്തിനും വേണ്ടിയാണ്​ പുതിയ സഖ്യമുണ്ടാക്കിയിരിക്കുന്നതെന്നും യോഗി വിമർശിച്ചു. ഡൽഹിയിൽ ചേർന്ന ബി.ജെ.പി ദേശീയ കൗൺസിൽ യോഗത്തിൽ സംസാരിക്കുകയായിരുന്നു അദ്ദേഹം. 

ബി.ജെ.പി സമൂഹത്തിലെ എല്ലാ തട്ടിലും വികസനമെത്തിക്കാനാണ്​ പ്രവർത്തിക്കുന്നത്​. എല്ലാവിധ മതവിഭാഗങ്ങളുടെയും വിശ്വാസത്തെ സംരക്ഷിക്കുകയും ചെയ്യുന്നുണ്ട്​. കോൺഗ്രസ്​ ഒരു കുടുംബത്തി​​െൻറ താൽപര്യത്തിനു വേണ്ടി ജാതീയതയും പ്രാദേശികവാദവും കപടതയുമായി 50 വർഷങ്ങളാണ്​ നശിപ്പിച്ചത്​.  പ്രധാനമന്ത്രി നരേന്ദ്രമോദിയുടെ നേതൃത്വത്തിലുള്ള ബി.ജെ.പി സർക്കാറാണ്​  സമൂഹത്തിലെ എല്ലാ മേഖലകളിലും വികസന-ക്ഷേമപ്രവർത്തനങ്ങളും മികച്ച ഭരണവും കാഴ്​ചവെച്ച്​ രാജ്യത്തെ വീണ്ടെടുത്തതെന്നും യോഗി ആദിത്യനാഥ്​ കൂട്ടിച്ചേർത്തു. 

2019 ലും മോദി സർക്കാർ തന്നെ ഭരണത്തിലെത്തും. ഗ്രാമീണ സ്​ത്രീകൾ, സൈനികർ, കർഷകർ, യുവജനങ്ങൾ എന്നിങ്ങനെ ഏതു മേഖലയിലുള്ള വ്യക്തി​യും ആഗ്രഹിക്കുന്നത്​ മോദി സർക്കാർ വീണ്ടും അധികാരത്തിലെത്തണം എന്നുതന്നെയാണെന്നും യോഗി പറഞ്ഞു. 

Loading...
COMMENTS