ഹൃദയമില്ലാത്ത സര്‍ക്കാർ; യെദിയൂരപ്പക്കെതിരെ രുക്ഷ വിമർശനവുമായി ഡി.കെ ശിവകുമാര്‍

ബംഗളൂരു: കര്‍ണാടകത്തിലെ ബി.ജെ.പി സര്‍ക്കാരിനെതിരെ രൂക്ഷ വിമര്‍ശനവുമായി  കര്‍ണാടക കോണ്‍ഗ്രസ് അധ്യക്ഷൻ ഡി.കെ ശിവകുമാര്‍. സംസ്ഥാനത്തുള്ള കുടിയേറ്റ തൊഴിലാളികള്‍ ദരിദ്രരാണ്. കഴിഞ്ഞ ഒരുമാസമായി ഇവര്‍ക്ക് ശമ്പളവും ലഭിക്കുന്നില്ല.  ഹൃദയമില്ലാത്ത ഒരു സര്‍ക്കാരിന് മാത്രമേ ഈ തൊഴിലാളികളിൽ അവരുടെ മടക്കയാത്രക്കായി വീണ്ടും പണം ആവശ്യപ്പെടാന്‍ കഴിയൂയെന്നും ശിവകുമാർ പറഞ്ഞു. ഹിന്ദുസ്ഥാൻ ടൈംസിന്​ നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം. 

കുടിയേറ്റ തൊഴിലാളികള്‍ക്ക് നല്‍കാനായി പണം കണ്ടെത്തിയത് പാര്‍ട്ടി പ്രവര്‍ത്തകരില്‍നിന്നാണെന്നും അദ്ദേഹം വ്യക്തമാക്കി. സംസ്ഥാനത്തെ കുടിയേറ്റ തൊഴിലാളികളുടെ പ്രശ്‌നം സോണിയാ ഗാന്ധിയേയും  രാഹുലിനേയും അറിയിച്ചു. അവരാണ് പണം നല്‍കാമെന്ന ആശയം മുന്നോട്ടുവെച്ചതെന്നും അദ്ദേഹം പറഞ്ഞു. കർണാടക കോൺഗ്രസാണ്​ ആദ്യം കുടിയേറ്റ തൊഴിലാളികൾക്കുള്ള യാത്രാ ചെലവ്​ വഹിക്കാൻ മുന്നോട്ട്​ വന്നത്​. ശേഷമാണ്​ ദേശീയ  നേതൃത്വം മുഴുവൻ യാത്രാ ചെലവ്​ വഹിക്കാൻ മുന്നോട്ട്​ വന്നത്​.  

കോണ്‍ഗ്രസ് നല്‍കിയ ചെക്ക് വ്യാജമാണെന്ന് പറഞ്ഞ റവന്യൂ മന്ത്രി പി. അശോകയെയും ശിവകുമാർ വിമർശിച്ചു. രാഷ്ട്രീയ പക്വതയില്ലാത്തതുകൊണ്ട്​ വ്യാജ ചെക്ക്​ എന്ന ആരോപണം അശോക നടത്തിയത്​. കെ.പി.സി.സിക്ക്​ വേണ്ടി ഒപ്പിട്ട ചെക്കാണ്​ നൽകിയതെന്നും അദ്ദേഹം പറഞ്ഞു. 

സംസഥാനത്ത്​ ആരോഗ്യമന്ത്രി ശ്രീരാമലുവും കോവിഡ്​ പ്രതിരോധ സംഘത്തിലുള്ള മെഡിക്കൽ വിദ്യാഭ്യാസ മന്ത്രി സുധാകറും തമ്മിൽ പോരാടിച്ചുകൊണ്ടിരിക്കുകയാണെന്നും ശിവകുമാർ ആരോപിച്ചു.