കേന്ദ്രസർക്കാർ ഓഫിസുകളിൽ നവം. എട്ടുമുതൽ വീണ്ടും ബയോമെട്രിക്​ പഞ്ചിങ്​ സംവിധാനം

ന്യൂഡൽഹി: കോവിഡ്​ 19 വ്യാപനം കുറഞ്ഞ സാഹചര്യത്തിൽ ജീവനക്കാരുടെ ഹാജർ രേഖപ്പെടുത്താൻ ബയോമെട്രിക്​ പഞ്ചിങ്​ സംവിധാനം തിരികെ കൊണ്ടുവരാനൊരുങ്ങി കേന്ദ്രസർക്കാർ. നവംബർ എട്ടുമുതൽ വീണ്ടും ബയോമെട്രിക്​ പഞ്ചിങ്​ ഏർപ്പെടുത്തും.

2020ൽ കോവിഡ്​ വ്യാപനം രൂക്ഷമായ സാഹചര്യത്തിൽ വിരലടയാളം പതിച്ച്​ ഹാജർ രേഖപ്പെടുത്തുന്ന ബയോമെട്രിക്​ പഞ്ചിങ്​ സംവിധാനം ഒഴിവാക്കിയിരുന്നു. കോവിഡ്​ മുൻ കരുതലുകളുടെ ഭാഗമായായിരുന്നു തീരുമാനം.

രജിസ്റ്ററിൽ ഹാജർ രേഖപ്പെടുത്താനായിരുന്നു ജീവനക്കാർക്ക്​ നൽകിയ നിർദേശം. എല്ലാ ജീവനക്കാർക്കും ബയോമെട്രിക്​ പഞ്ചിങ്​ സംവിധാനം തിരികെ കൊണ്ടുവരുമെന്ന്​ കേന്ദ്ര പേഴ്​സനൽ മന്ത്രാലയം അറിയിച്ചു. അടുത്ത തിങ്കളാഴ്​ച മുതൽ സംവിധാനം നിലവിൽ വരുമെന്നും അറിയിച്ചു.

ബയോമെട്രിക്​ പഞ്ചിങ്​ സംവിധാനം പുനഃസ്​ഥാപിച്ചാലും ഹാജർ രേഖപ്പെടുത്തുന്നതിന്​ മുമ്പും ശേഷവും ജീവനക്കാർ കൈകൾ സാനി​റ്റൈസറുകൾ ഉപയോഗിച്ച്​ വൃത്തിയാക്കുന്നുണ്ടെന്ന്​ അതത്​ വകുപ്പ്​ മേധാവികൾ ഉറപ്പുവരുത്തണം. ഹാജർ രേഖപ്പെടുത്താൻ എത്തുന്ന ജീവനക്കാർ തമ്മിൽ ആറടി അകലം പാലിക്കണം. തിരക്ക്​ ഒഴിവാക്കാൻ ഒരു ബയോമെട്രിക്​ പഞ്ചിങ്​ മെഷീൻ കൂടി സ്​ഥാപിക്കാമെന്നും നിർദേശത്തിൽ പറയുന്നു.

ജീവനക്കാർ മുഴുവൻ സമയവും മാസ്​ക്​ ധരിക്കണം. ഇടക്കിടെ ബയോമെട്രിക്​ പഞ്ചിങ്​ മെഷീൻ വൃത്തിയാക്കണം. വായുകടക്കുന്ന പ്രദേശത്താകണം ബയോമെട്രിക്​ മെഷീനുകൾ സ്​ഥാപിക്കേണ്ടതെന്നും നിർദേശത്തിലുണ്ട്​.

കോവിഡിനെ തുടർന്ന്​ സർക്കാർ ഓഫിസുകളിൽ ഹാജർ നില കുറച്ചിരുന്നു. ​കോവിഡ്​ വ്യാപനം കുറഞ്ഞ സാഹചര്യത്തിൽ കേന്ദ്ര സർക്കാർ ഓഫിസുകളുടെ പ്രവർത്തനം സാധാരണ നിലയിലാക്കുന്ന പദ്ധതിയുടെ ഭാഗമായാണ്​ ബയോമെട്രിക്​ പഞ്ചിങ്​ സംവിധാനം പുനസ്​ഥാപിക്കുന്നത്​.