കോവിഡ്;​ ശ്മശാനങ്ങളിൽ ഓൺലൈൻ ബുക്കിങ്ങ്​ സംവിധാനങ്ങളുമായി കർണാടക

ബംഗളുരു: കോവിഡ്​ ബാധിച്ച്​ മരിക്കുന്നവരുടെ എണ്ണത്തിൽ വർധനയുണ്ടായ സാഹചര്യത്തിൽ ബംഗളുരുവിലെ ശ്മശാനങ്ങൾ ബുക്ക്​ ചെയ്യാൻ ഹെൽപ്പ്​ലൈൻ സൗകര്യമൊരുക്കി കർണാടക.

ഒരാൾ വീട്ടിലോ ആശുപത്രിയി​ലോ മരിച്ചാൽ അവരുടെ ബന്ധുക്കൾക്ക്​ 24x7 ഹെൽപ്പ് ലൈൻ നമ്പറായ +91 8495998495 ൽ നമ്പറിൽ വിളിച്ചോ വാട്​സ്​ ആപ്പ്​ വഴി സന്ദേശം അയച്ചോ ശ്​മശാനം ബുക്ക്​ ചെയ്യാം.

സംസ്​കാരത്തിനുള്ള തീയതി, സമയം, സ്ഥലം എന്നിവയും മരണപ്പെട്ടയാളുടെ അന്തിമ ചടങ്ങുകൾ നടത്തുന്നതിന് ആവശ്യമായ മറ്റ് വിവരങ്ങളും നൽകണം. തുടർന്ന്​ ഒരു ടോക്കൺ നമ്പർ എസ്​.എം.എസായി ലഭിക്കും. ഇത്​ ശ്​മശാന അധികൃതരെ കാണിക്കുന്നതോടെ സംസ്​കാര ചടങ്ങുകൾ നടത്താനുള്ള അവസരം ലഭിക്കും.

പീനിയ, കെംഗേരി, സമ്മനഹള്ളി, പനാറ്റൂർ, ഹെബ്ബൽ, കലഹള്ളി, കുഡ്‌ലു, ഹരിചന്ദ്ര ഘട്ട്, മൈസൂർ റോഡ്, ബനശങ്കരി, വിൽസൺ ഗാർഡൻ, ചാമരാജ്‌പേട്ട്, ഗിദ്ദനഹള്ളി, തവാരേക്കരെ, ടി.ആർ മിൽസ്, മവല്ലിപുര, ദേവല്ലിപുര എന്നീ ശ്​മശാനങ്ങളിലാണ്​ ഓൺലൈൻ വഴി ബുക്ക്​ ചെയ്യാൻ നിലവിൽ സൗകര്യമുള്ളത്​.

കോവിഡ് ബാധിച്ച് മരിച്ചവരെ കൊണ്ടുപോകുന്നതിന് ആംബുലൻസും സംസ്കാരത്തിന് ശ്മശാനവും യാതൊരു ഫീസും ഈടാക്കരുതെന്ന ഉത്തരവ് ഇതിലും ആവർത്തിച്ചിട്ടുണ്ട്.