ഒാൺലൈൻ വാർത്തകളെ നിയന്ത്രിക്കാർ കേന്ദ്രസർക്കാർ സമിതി

ന്യൂഡൽഹി: വ്യാജ വാർത്തകൾ നൽകുന്ന മാധ്യമപ്രവർത്തകരുടെ അക്രി​ഡിറ്റേഷൻ റദ്ദാക്കാനുള്ള വിവാദ ഉത്തരവ്​ പിൻവലിച്ചതിന്​ പിന്നാലെ ഒാൺലൈൻ മാധ്യമങ്ങളെ നിയന്ത്രിക്കാൻ കേന്ദ്രസർക്കാർ. ഒാൺലൈൻ മാധ്യമങ്ങളെ നിയ​ന്ത്രിക്കുന്നതിനായി നിയമങ്ങളും ചട്ടങ്ങളും രൂപീകരിക്കാൻ സമിതിയെ നിയോഗിക്കാനാണ്​ വാർത്ത വിനിമയ മന്ത്രാലയത്തി​​​െൻറ തീരുമാനം.

അതേ സമയം, ഇതുസംബന്ധിച്ച്​  ഉത്തരവുകളൊന്നും ഒൗദ്യോഗികമായി പുറത്തിറങ്ങിയിട്ടില്ല. എന്നാൽ, ഒാൺലൈൻ മാധ്യമങ്ങളെ  നിയന്ത്രിക്കുന്നത്​ സംബന്ധിച്ച വാർത്ത വിനിമയ മന്ത്രാലത്തി​​​െൻറ ഉത്തരവ്​ വ്യാപകമായി ഇൻറർനെറ്റിലുടെ അനൗദ്യോഗികമായി പ്രചരിക്കുന്നുണ്ട്​. ബ്രോഡ്​കാസ്​റ്റിങ്​ ഡയറക്​ടർ അമിത്​ കറ്റോച്ച്​ ഒപ്പുവെച്ച ഉത്തരവാണ്​ പ്രചരിക്കുന്നത്​.

ഒാൺലൈൻ മീഡിയ, വെബ്​സൈറ്റുകൾ, ന്യൂസ്​ പോർട്ടലുകൾ എന്നിവയെ നിയന്ത്രിക്കുന്നതിനുള്ള ​വ്യവസ്ഥകളാണ്​ നിയമത്തിൽ ഉൾപ്പെടുക. മന്ത്രാലയം രൂപീകരിക്കുന്ന പത്തംഗ കമ്മിറ്റി വിഷയം പഠിച്ച്​ ചട്ടങ്ങൾ രൂപീകരിക്കും. വാർത്ത വിതരണ മന്ത്രാലയം, നിയമം, ​െഎ.ടി, ആഭ്യന്തരം, ഇലക്​ട്രോണിക്​സ്​ തുടങ്ങിയ മന്ത്രാലയങ്ങളിലെ സെക്രട്ടറിമാരും പ്രസ്​ കൗൺസിൽ ഒാഫ്​ ഇന്ത്യ, ബ്രോഡ്​കാസ്​റ്റേഴ്​സ്​ അസോസിയേഷൻ, ബ്രോഡ്​കാസ്​റ്റേഴ്​സ്​ ഫെഡറേഷൻ പ്രതിനിധികളും സമിതിയിൽ അംഗമായിരിക്കും.