വാൾപ്പാറ-ചാലക്കുടി റൂട്ടിൽ ഒൻപത് വർഷത്തിന് ശേഷം തമിഴ്​നാട്​ സർക്കാർ ബസ് സർവിസ്

കോയമ്പത്തൂർ: ഒൻപത്​ വർഷം മുമ്പ് നിർത്തിയ വാൾപ്പാറ- ചാലക്കുടി റൂട്ടിലെ തമിഴ്​നാട്​ സർക്കാർ ബസ് സർവിസ് ജനകീയ ആവശ്യത്തെ തുടർന്ന് ബുധനാഴ്ച മുതൽ പുന:രാരംഭിച്ചു.

കോയമ്പത്തൂർ ജില്ലയിലെ തോട്ടം മേഖലയും വിനോദസഞ്ചാര കേന്ദ്രവുമായ വാൾപ്പാറ കേരള-തമിഴ്നാട് അതിർത്തിയിലാണ്. വാൾപ്പാറയിൽ താമസിക്കുന്നവരിൽ 30 ശതമാനവും മലയാളികളാണ്​. വാൾപ്പാറയിൽ നിന്ന് ചാലക്കുടിയിലേക്ക് വനപാതയുണ്ട്.

വാൾപ്പാറയിലേക്ക് വരുന്ന വിനോദസഞ്ചാരികളും വാൾപ്പാറയിൽ നിന്ന് കേരളത്തിലേക്ക് പോകുന്ന പൊതുജനങ്ങളും സ്വകാര്യ ബസുകളെയാണ്​ ആശ്രയിച്ചിരുന്നത്​. 2013 മാർച്ച് 29 വരെ തമിഴ്‌നാട് സർക്കാർ ബസ് സർവീസ് നടത്തിയിരുന്നു. വാൾപ്പാറയിൽ നിന്ന് പോയ സർക്കാർ ബസ് കേരള വനഭാഗത്തുവെച്ച്​ അപകടത്തിൽപ്പെട്ടിരുന്നു. ഇതിൽ നിരവധി പേർക്ക് പരിക്കേറ്റു. ഇതോടെയാണ്​ ബസ് സർവീസ് നിർത്തിയത്​.

വാൾപ്പാറ-​ ചാലക്കുടി റൂട്ടിൽ​ സർക്കാർ ബസ് സർവിസ്​ പുന:രാരംഭിക്കണമെന്നത്​ ഏറെക്കാലത്തെ ആവശ്യമായിരുന്നു. ഇതേത്തുടർന്നാണ് തമിഴ്‌നാട് സർക്കാർ ബസ്​ സർവിസിന്​ അനുമതി നൽകിയത്​. ബസിന്​ വാൾപ്പാറയിൽ ജനപ്രതിനിധികൾ സ്വീകരണം നൽകി.