ബ്രിട്ടീഷുകാർ കടത്തിയ രത്നങ്ങൾ പതിച്ച ബുദ്ധന്റെ തിരുശേഷിപ്പ് 870 കോടി രൂപക്ക്‍ വാങ്ങി ഗോദ്റെജ് ഇന്ത്യയിലെത്തിച്ചു

ന്യൂഡൽഹി: അമൂല്യങ്ങളായ രത്നങ്ങൾ പതിച്ച പിപ്രഹ്വ എന്നറിയപ്പെടുന്ന ബുദ്ധന്റെ തിരുശേഷിപ്പ് 127 വർഷങ്ങൾക്കുശേഷം ഇന്ത്യയിലേക്കെത്തിച്ചു. ഹോങ്കോങ്ങിൽ ലേലത്തിനു വെച്ച വിശുദ്ധ പേടകം എതാണ്ട് 870 കോടി രൂപക്ക് വാങ്ങി ഗോദറെജ് വ്യവസായ ശൃംഖലയുടെ ഉടമ പിറേജ്ഷാ ഗോദ്റെജ് ആണ് സ്വന്തമാക്കിയത്. ​ലേലത്തി​ന്റെ യഥാർത്ഥ തുക ഇതു​വരെ ​വെളിപ്പെടുത്തിയിട്ടില്ല. എന്നാൽ ഏകദേശം പത്തുകോടി ഡോളർ എന്നാണ് കണക്കാക്കിയിരിക്കുന്നത്.

ഗവൺമെന്റ്-സ്വാകര്യ പകാളിത്തമുള്ള മാതൃകാപരമായ സംവിധാനമാണിതെന്ന് കേന്ദ്രമന്ത്രി ഗജേന്ദ്രസിങ് ശെഖാവത്ത് പറയുന്നു. തിരുശേഷിപ്പ് മൂന്നു മാസം നാഷണൽ മ്യൂസിയത്തിൽ പ്രദർശിപ്പിക്കുമെന്ന് ഗോദ്റെജ് സമ്മതിച്ചിട്ടുണ്ട്.

127 വർഷത്തിനുശേഷം ബുദ്ധന്റെ തിരുശേഷിപ്പ് ഇന്ത്യയിലേ​ക്കെത്തുന്നതിൽ ഓരോ ഇന്ത്യക്കാരനും അഭിമാനിക്കാമെന്ന് പ്രധാനമന്ത്രി നരേന്ദ്രമോദി എക്സിൽ കുറിച്ചു. നമ്മുടെ മഹത്തായ ചരിത്ര പാരമ്പര്യത്തിന്റെ ​ശേഷിപ്പുകൾ സംരക്ഷിക്കുന്നതിലുള്ള നമ്മുടെ അർപ്പണബോധമാണ് വെളിവാക്കപ്പെടുന്നതെന്നും നരേന്ദ്രമോദി കുറിച്ചു.

ബുദ്ധന്റെ ജന്മസ്ഥലമായ ലുംബിനിക്കടുത്ത് നേപ്പാൾ അതിർത്തിയായ ഉത്തർപ്രദേശിലെ പിപ്രഹ്വയിലെ ബുദ്ധസ്തൂപത്തിൽ നടത്തിയ ഉദ്ഘനനത്തിൽ നിന്നാണ് അമൂല്യമായ ഈ തിരുശേഷിപ്പ് ലഭിക്കുന്നത്. ബുദ്ധനുമായി ബന്ധ​പ്പെട്ട് മതപരമായും സാംസ്കാരികമായും അതീവ പ്രാധാന്യമുള്ളതാണ് ഈ തിരുശേഷിപ്പുകൾ.

ബുദ്ധന്റേതാണെന്ന് വിശ്വസിക്ക​പ്പെടുന്ന അസ്ഥി ഉള്ളടക്കം ചെയ്ത വിലപിടിപ്പുള്ള പേടകം അനേകം അമൂല്യമായ രത്നങ്ങൾ പതിച്ചതാണ്. ഇ​തോടൊപ്പം ലഭിച്ച പല ​ശേഷിപ്പുകളും 1898 മുതൽ കൊൽക്കത്തയിലെ ഇന്ത്യൻ മ്യുസിയത്തിൽ സൂക്ഷിച്ചിട്ടുണ്ട്. ഇതും പുതിയ ശേഷിപ്പിനൊപ്പം നാഷണൽ മ്യൂസിയത്തിൽ പ്രദർശിപ്പിക്കും.

അന്ന് ഉദ്ഘനനം നടത്തിയ ബ്രിട്ടീഷ് ഗവേഷകനായ വില്യം ക്ലാക്സ്റ്റൺ പെപ്പെ ത​ന്റെ സ്വകാര്യ ശേഖരത്തിൽ സൂക്ഷിച്ചിരിക്കുകയായിരുന്നു ഈ അമൂല്യ ശേഖരം. അദ്ദേഹത്തിന്റെ ചെറുമകൻ ഇത് ഹോങ്കോങ്ങിൽ ലേലത്തിന് വെക്കുകയായിരുന്നു ഇത്. ​

മേയ് ഏഴിന് നിശ്ചയിച്ചിരുന്ന ലേലം ഇന്ത്യൻ സാംസ്കാരിക മന്ത്രാലയം നോട്ടീസ് അയച്ചതോടെ നിർത്തിവെച്ചു. ലേലം നടത്താതെ ഇത് ഇന്ത്യക്ക് നൽകണമെന്ന് ഓക്ഷൻ ഹൗസിനോട് ഇന്ത്യ അഭ്യർഥിച്ചിരുന്നു. പല ബുദ്ധിസ്റ്റ് സംഘടനകളും ഈ ആവശ്യം ഉന്നയിച്ചു. എന്നാൽ അവർ തയ്യാറായില്ല. കേന്ദ്രമ​ന്ത്രി ഗ​ജേന്ദ്രസിങ് യു.കെ സാംസ്കാരിക സെക്രട്ടറിയെ ബന്ധപ്പെട്ടെങ്കിലും അവർ നിസഹായത അറിയിച്ച​തോടെ ഗോദ്റെജ് രംഗത്തുവരികയായിരുന്നു.