ഗോവക്ക്​ ആവശ്യം മമത ബാനർജിയെ; കോൺഗ്രസ്​ വിടുമെന്ന അഭ്യൂഹങ്ങൾക്ക്​ പിന്നാലെ ലൂസിഞ്ഞോ

ന്യൂഡൽഹി: കോൺഗ്രസ്​ വിട്ട്​ തൃണമൂൽ കോൺഗ്രസി​ൽ ചേരുമെന്ന അഭ്യൂഹങ്ങൾക്ക്​ പിന്നാലെ പശ്ചിമബംഗാൾ മുഖ്യമന്ത്രി മമത ബാനർജിയെ പുകഴ്​ത്തി ഗോവ മുൻ മുഖ്യമന്ത്രിയും മുതിർന്ന കോൺഗ്രസ്​ നേതാവുമായ ലൂസിഞ്ഞോ ഫലേറൊ. കോൺഗ്രസിൽനിന്ന്​ താൻ ഒരുപാട്​ കഷ്​ടപാടുകൾ അനുഭവിച്ചിട്ടുണ്ടെന്നും ഇപ്പോൾ ഗോവക്കാരുടെ കഷ്​ടതകൾ അവസാനിപ്പിക്കണമെന്നാണ്​ ആഗ്രഹമെന്നും ലൂസിഞ്ഞോ പറഞ്ഞു.

കോൺഗ്രസ്​ വിട്ട്​ ലൂസിഞ്ഞോ തൃണമൂലിൽ ചേരു​െമന്നും തിങ്കളാഴ്ച പ്രഖ്യാപനമുണ്ടായേക്കുമെന്നുള്ള അഭ്യൂഹങ്ങൾ പരന്നിരുന്നു. ഇതിന്​ ആക്കം കൂട്ടുന്നതാണ്​ ലൂസിഞ്ഞോയുടെ പുതിയ പ്രതികരണം.

നവേലിം മണ്ഡലത്തിലെ എം.എൽ.എ സ്​ഥാനം അദ്ദേഹം രാജിവെച്ചു. രാജിക്കത്ത്​ സ്​പീക്കർ രാജേഷ്​ പട്​നേക്കറിന്​ തിങ്കളാഴ്ച അദ്ദേഹം കൈമാറുകയും ചെയ്​തു. രാജിക്കത്ത്​ കൈമാറിയതിന്​ ശേഷം നൂറോളംവരുന്ന ആളു​കളെ അഭിസംബോധന ചെയ്​ത്​ സംസാരിക്കുകയായിരുന്നു അദ്ദേഹം.

'മാന്യമായ നിശബ്​ദത പാലിച്ച്​ എല്ലാം ഞാൻ സഹിച്ചു. ഞാൻ ഇത്രമാത്രം കഷ്​ടപാടുകൾ അനുഭവിക്കുന്നുണ്ടെങ്കിൽ കോൺഗ്രസിന്​ വോട്ട്​ ചെയ്​ത്​ അധികാരത്തിലെത്തിച്ച ഗോവക്കാരുടെ അവസ്​ഥ ചിന്തിച്ചുനോക്കൂ. ഈ കഷ്​ടപാടുകൾ അവസാനിപ്പിക്കണം. ഗോവയിൽ പുതിയ പ്രഭാതം കൊണ്ടുവരണം' -അദ്ദേഹം പറഞ്ഞു.

സ്​ത്രീ ശാക്തീകരണത്തിന്‍റെയും തെരുവ്​ പോരാളിയുടെയും പ്രതീകമാണ്​ മമത ബാനർജിയെന്ന്​ ലൂസിഞ്ഞോ പറഞ്ഞു. 'സ്​ത്രീ ശാക്തീകരണത്തിന്‍റെയും തെരുവ് പോരാളികളുടെയും പ്രതീകമാണ്​ മമത. വിഭജന ശക്തികളോട്​ പോരാടുകയാണ്​ അവർ. ബി.ജെ.പിക്ക്​ നേരിട്ടുള്ള വെല്ലുവിളിയും അവർ ഉയർത്തുന്നു. ഗോവയിൽ വരാനും ചുമതല ​ഏറ്റെടുക്കാനും ഞാൻ മമതയോ​ട്​ അഭ്യർഥിക്കുന്നു' -ലൂസിഞ്ഞോ പ്രതികരിച്ചു. തനിക്ക്​ വയസായെങ്കിലും തന്‍റെ രക്തം ഇപ്പോഴും ചെറുപ്പമാണെന്നും അദ്ദേഹം കൂട്ടിച്ചേർത്തു.

പാർട്ടി നേതൃത്വവുമായി തുടരുന്ന തർക്കത്തെ തുടർന്നാണ്​ മുതിർന്ന നേതാവ്​ പാർട്ടി വിടുന്നതെന്ന്​ അടുത്ത വൃത്തങ്ങൾ പറയുന്നു. തൃണമൂൽ കോൺഗ്രസുമായി ലൂസിഞ്ഞോ ചർച്ച നടത്തിരുന്നു. ഇതിൽ പാർട്ടി മികച്ച ഓഫർ ലൂസി​േഞ്ഞാക്ക്​ നൽകിയതായും പറയുന്നു.