ഗോവയിലെ ചൂതാട്ട കേന്ദ്രത്തിലെ 32 പേർക്ക്​ കോവിഡ്​; യാത്രികർക്ക്​ നെഗറ്റീവ്​ സർട്ടിഫിക്കറ്റ്​ നിർബന്ധമല്ലെന്ന്​ മുഖ്യമന്ത്രി

പനാജി: ഗോവയിലെ ചൂതാട്ട കേ​ന്ദ്രത്തിലെ 32 ജീവനക്കാർക്ക്​ കോവിഡ്​ സ്ഥിരീകരിച്ചു. രോഗബാധ സ്ഥിരീകരിച്ച ജീവനക്കാരെ പ്രത്യേക കെട്ടിടത്തിലേക്ക്​ മാറ്റി. ചൂതാട്ടകേന്ദ്രത്തിന്​ തുടർന്നും പ്രവർത്തിക്കാമെന്നും ജീവനക്കാരെ നിശ്​ചിത ഇടവേളകളിൽ കോവിഡ്​ പരിശോധനക്ക്​ വിധേയമാക്കണമെന്നും അധികൃതർ നിർദേശിച്ചു.

അതേസമയം, ഗോവയിൽ പുതിയ കോവിഡ്​ മാനദണ്ഡം ശനിയാഴ്ച മുതൽ നിലവിൽ വരും. അന്യ സംസ്ഥാനങ്ങളിൽ നിന്ന്​ എത്തുന്നവർക്ക്​ കോവിഡ്​ നെഗറ്റീവ്​ സർട്ടിഫിക്കറ്റ്​ നിർബന്ധമല്ലെന്ന ഗോവ മുഖ്യമന്ത്രി പ്രമോദ്​ സാവന്ത്​ അറിയിച്ചു. നേരത്തെ, മഹാരാഷ്​ട്ര, കർണാടക, കേരള തുടങ്ങിയ സംസ്ഥാനങ്ങളിൽ നിന്ന്​ വരുന്നവർക്ക്​ ഗോവ കോവിഡ്​ നെഗറ്റീവ്​ സർട്ടിഫിക്കറ്റ്​ നിർബന്ധമാക്കുമെന്ന്​ റിപ്പോർട്ടുകളുണ്ടായിരുന്നു.

അതേസമയം, കോവിഡിനെ തുടർന്ന്​ ഗോവയിൽ ഏപ്രിൽ ആദ്യവാരം നടക്കേണ്ടിയിരുന്ന ഷിഗ്​മോ വേനൽക്കാല ഫെസ്റ്റിവൽ റദ്ദാക്കി​. ഗോവയിൽ 1200ഓളം പേരാണ്​ കോവിഡ്​ ബാധിച്ച്​ ചികിത്സയിലുള്ളത്​.