ഗോവ കോൺഗ്രസ്​ അധ്യക്ഷൻ ശാന്താറാം നായിക് രാജിവെച്ചു

പനാജി: ഗോവയിൽ കോൺഗ്രസ്​ പാർട്ടി സംസ്ഥാന അധ്യക്ഷൻ ശാന്താറാം നായിക്​ പദവി രാജിവെച്ചു. പാര്‍ട്ടി അധ്യക്ഷന്‍ രാഹുല്‍ ഗാന്ധിയുടെ  പ്രസംഗത്തില്‍ നിന്ന് പ്രചോദനം ഉള്‍ക്കൊണ്ടാണ്​ രാജി​. രാജികത്ത് രാഹുൽ ഗാന്ധിക്ക്​ അയച്ചതായും നായിക്​ പറഞ്ഞു.  

എ.ഐ.സി.സി പ്ലീനറി സമ്മേളനത്തില്‍ രാഹുലി​​​െൻറ പ്രസംഗത്തില്‍ നിന്ന് പ്രചോദനം ഉള്‍ക്കൊണ്ട് പുതിയതലമുറക്ക്​ വഴിമാറിക്കൊടുക്കാനാണ് രാജിയെന്ന്  ശാന്താറാം പറഞ്ഞു.

ഞായറാഴ്​ച നടന്ന പ്ലീനറി യോഗത്തിൽ  പുതുതലമുറ നേതൃനിരയിലേക്ക് കടന്നുവരണമെന്നും നേതാക്കൾ കൂടുതൽ പരിഗണന യുവാക്കൾക്ക്​ നൽകണമെന്നും രാഹുല്‍ ആഹ്വാനം ചെയ്തിരുന്നു. 2017 ജൂലൈയിലാണ്​ 71 കാരനായ ശാന്താറാം പാർട്ടി സംസ്ഥാന അധ്യക്ഷൻ പദവിയിലെത്തിയത്​.