ലൈംഗികബന്ധത്തിനും പണത്തിനും കാമുകന്‍റെ ഭീഷണി; ആത്മഹത്യക്ക്​ ശ്രമിച്ച പെൺകുട്ടിക്ക്​ പക്ഷാഘാതം

ലഖ്​നോ: പ്രണയബന്ധത്തിന്​ പിന്നാലെ കാമുകനും സുഹൃത്തുക്കളും ഭീഷണിപ്പെടത്തിയ പെൺകുട്ടി ആത്മഹത്യക്ക്​ ശ്രമിച്ചു. പാലത്തിന്​ മുകളിൽനിന്ന്​ താഴേക്ക്​ ചാടി ആത്മഹത്യചെയ്യാൻ ശ്രമിച്ച 20കാരിയെ രക്ഷപ്പെടുത്തിയെങ്കിലും പക്ഷാഘാതം സംഭവിക്കുകയായിരുന്നു.

കാമുകന്‍റെയും സുഹൃത്തുക്കളുടെയും നിരന്തര ഭീഷണിയാണ്​ പെൺകുട്ടിയെ കടുംകൈ ചെയ്യാൻ പ്രേരിപ്പിച്ചത്​.

ഉത്തർപ്രദേശിലെ മൊറാദാബാദിലാണ്​ സംഭവം. ശദബ്​ എന്ന യുവാവുമായി ഏകദേശം നാലുമാസം മുമ്പ്​ പ്രണയത്തിലാകുകയായിരുന്നു പെൺകുട്ടി. ഒരിക്കൽ ശദബിന്‍റെ ബന്ധുവിന്‍റെ വീട്ടിലേക്ക്​ പെൺകുട്ടിയെ കൂട്ടി​െക്കാണ്ടുപോയിരുന്നു. അവിടെവെച്ച്​ പെൺകുട്ടിയെ നിർബന്ധിച്ച്​ നഗ്​ന ചിത്രങ്ങളും വിഡിയോകള​ും എടുത്തു.

തുടർന്ന്​ ഇയാൾ ചി​ത്രങ്ങൾ മൂന്ന്​ സുഹൃത്തുക്കൾക്ക്​ അയച്ചുനൽകിയതായും പെൺകുട്ടി പറയുന്നു. ഇതിനുശേഷം ശദബും സുഹൃത്തുക്കളും ചേർന്ന്​ പെൺകുട്ടിയെ ഭീഷണിപ്പെടുത്താൻ ആരംഭിച്ചു. സുഹൃത്തുക്കൾക്കൊപ്പം ലൈംഗിക ബന്ധത്തിൽ ഏർപ്പെടണമെന്നും അല്ലെങ്കിൽ പണം നൽകണമെന്നുമായിരുന്നു ഭീഷണി. നിർദേശം അനുസരിച്ചില്ലെങ്കിൽ ചിത്രങ്ങളും വിഡിയോകളും സമൂഹമാധ്യമങ്ങളിലൂടെ പ്രചരിപ്പിക്കുമെന്നും ഇയാൾ ഭീഷണിപ്പെടുത്തി. എന്നാൽ പെൺകുട്ടി യുവാവിന്‍റെ ആവശ്യം നിഷേധിച്ചു.

'അവൻ എന്നോട്​ സുഹൃത്തുക്കൾക്കൊപ്പം ലൈംഗിക ബന്ധത്തിൽ ഏർപ്പെടണമെ​ന്നും അല്ലെങ്കിൽ 50,000 രൂപ നൽകണമെന്നും ഭീഷണിപ്പെടുത്തി. അല്ലെങ്കിൽ സമൂഹമാധ്യമങ്ങളിൽ ചിത്രങ്ങൾ പ്രചരിപ്പിക്കുമെന്ന്​ പറഞ്ഞു. ഇത്​ പുറത്തറിഞ്ഞാൽ എന്‍റെ കുടുംബം എന്നെ സംരക്ഷിക്കില്ലെന്ന്​ അവന്‍റെ സുഹൃത്തുക്കൾ പറഞ്ഞു' -പെൺകുട്ടി പറഞ്ഞതായി ​ടൈംസ്​ ഓഫ്​ ഇന്ത്യ റിപ്പോർട്ട്​ ചെയ്​തു.

കാമുകനിൽനിന്നും സുഹൃത്തുക്കളിൽനിന്നും ഭീഷണി കടുത്തതോടെ പെൺകുട്ടി ജീവനൊടുക്കാൻ ശ്രമിക്കുകയായിരുന്നു. തുടർന്ന്​ പാലത്തിന്​ മുകളിൽനിന്ന്​ താ​േഴക്ക്​ ചാടി. ​പെൺകുട്ടി താഴേക്ക്​ ചാടുന്നത്​ കണ്ട പ്രദേശവാസികൾ ഉടൻ തന്നെ രക്ഷപ്പെടുത്തുകയായിരുന്നു. ആശുപത്രിയിലെത്തിച്ചതിനാൽ ജീവൻ തിരിച്ചുകിട്ടി. എന്നാൽ കുട്ടിയുടെ രണ്ടുകാലുകളും തളർന്നുപോകുകയായിരുന്നു.

പെൺകുട്ടിയുടെ കുടുംബത്തിന്‍റെ പരാതിയിൽ പൊലീസ്​ കേസെടുത്തു. ശദബ്​, സു​ഹൃത്തുക്കളായ ആരിഫ്​, സദ്ദാം, റാഷിദ്​ എന്നിവർക്കെതിരെയാണ്​ കേസ്​.