ബസ്​ സർവീസ്​ പുനഃരാരംഭിക്കണമെന്ന്​ ആവശ്യപ്പെട്ട്​ ചീഫ്​ ജസ്റ്റിസിന്​ എട്ടാം ക്ലാസുകാരിയുടെ കത്ത്​; ഇടപ്പെട്ട്​ എൻ.വി.രമണ

ന്യൂഡൽഹി: ഗ്രാമത്തിലേക്കുള്ള ബസ്​ സർവീസ്​ പുനഃസ്ഥാപിക്കണമെന്ന്​ ആവശ്യപ്പെട്ട് സ​ുപ്രീംകോടതി​ ചീഫ്​ ജസ്റ്റിസ്​ എൻ.വി.രമണക്ക്​ എട്ടാം ക്ലാസ്​ വിദ്യാർഥിയുടെ കത്ത്​​. റാൺഗ്രേഡ്ഡി ജില്ലയിലെ സ്വന്തം ഗ്രാമത്തിലേക്കുള്ള ബസ്​ സർവീസ്​ വീണ്ടും തുടങ്ങണമെന്ന്​ ആവശ്യപ്പെട്ടാണ്​ വൈഷ്​ണവി എന്ന വിദ്യാർഥിനി കത്തയച്ചത്​. കോവിഡിന്​ ശേഷം ബസ്​ സർവീസ്​ നിർത്തുകയായിരുന്നുവെന്നും കത്തിൽ പറഞ്ഞിട്ടുണ്ട്​.

വൈഷ്​ണവിക്കും സഹോദരി പ്രീതിക്കും സഹോദരൻ പ്രണീതിനും ബസില്ലാത്തതിനാൽ സ്​കൂളിൽ പോകാനാവുന്നില്ല​. ഓ​ട്ടോറിക്ഷയിൽ പോകുന്നതിനുള്ള സാമ്പത്തികശേഷിയില്ല. പിതാവ്​ കോവിഡ്​ ബാധിച്ച്​ മരിച്ചതിന്​ ശേഷം അമ്മയുടെ ചെറിയ വരുമാനത്തിലാണ്​ കുടുംബം കഴിയുന്നതെന്നും വൈഷ്​ണവി കത്തിൽ പറയുന്നു.

കത്ത്​ ലഭിച്ചയുടൻ ചീഫ്​ ജസ്റ്റിസ്​ തെലങ്കാന റോഡ്​ ട്രാൻസ്​പോർട്ട്​ കോർപ്പറഷനുമായി ബന്ധപ്പെട്ട്​ ബസ്​ സർവീസ്​ പുനഃരാരംഭിക്കാൻ നിർദേശം നൽകി. കുട്ടിയുടെ പഠിക്കാനുള്ള അവകാശത്തെ നിഷേധിക്കാനാവില്ലെന്നും ചീഫ്​ ജസ്റ്റിസ്​ പറഞ്ഞു. ചീഫ്​ ജസ്റ്റിന്‍റെ നിർദേശത്തിന്​ പിന്നാലെ ബസ്​ സർവീസ്​ പുനഃരാരംഭിച്ചുവെന്ന്​ അറിയിച്ച്​ തെലങ്കാന റോഡ്​ ട്രാൻസ്​പോർട്ട്​ കോർപ്പറേഷൻ രംഗത്തെത്തി. കോർപ്പറേഷൻ മാനേജ്​മെന്‍റ്​ വൈഷ്​ണവിയുമായും അമ്മയുമായും ഫോണിൽ സംസാരിക്കുകയും ചെയ്​തു.

ഇക്കാര്യം കോർപ്പറേഷനെ അറിയിച്ച ചീഫ്​ ജസ്റ്റിനോട്​ അവർ നന്ദി പ്രകടിപ്പിക്കുകയും ചെയ്​തു. ഇതാദ്യമായല്ല ചീഫ്​ ജസ്റ്റിസ്​ എൻ.വി.രമണ കുട്ടികളുടെ കത്തിന്​ മറുപടി നൽകുന്നത്​. നേരത്തെ കേരളത്തിൽ നിന്നുള്ള ഒരു പെൺകുട്ടിയുടെ കത്തിനും ചീഫ്​ ജസ്റ്റിസ്​ മറുപടി നൽകിയിരുന്നു.