കുരങ്ങന്മാർ ടെറസിൽനിന്ന് തള്ളിയിട്ടു; വിദ്യാർഥിനിക്ക് ദാരുണാന്ത്യം

പട്ന: കുരങ്ങന്മാർ വീടിന്‍റെ ടെറസിൽനിന്ന് തള്ളിയതിനെ തുടർന്ന് താഴെ വീണ് 10-ാം ക്ലാസ് വിദ്യാർഥിനി മരിച്ചു. ബിഹാറിലെ സിവാൻ ജില്ലയിൽ ഭഗവാൻപൂർ പോലീസ് സ്‌റ്റേഷൻ പരിധിയിലെ മഘർ ഗ്രാമത്തിലാണ് ദാരുണ സംഭവം. പ്രിയ കുമാർ എന്ന വിദ്യാർഥിനിയാണ് മരിച്ചത്.

തണുപ്പ് കാരണം വീടിന്‍റെ മേൽക്കൂരയിൽ കയറി വെയിലത്ത് ഇരുന്ന് പഠിക്കുകയായിരുന്നു പ്രിയ. ഈ സമയം ഒരു കൂട്ടം കുരങ്ങുകൾ ചാടിയെത്തി ആക്രമിക്കുകയായിരുന്നെന്ന് ദൃസാക്ഷികൾ പറയുന്നു. ബഹളം വെച്ച് കുരങ്ങന്മാരെ ഓടിക്കാൻ ശ്രമിച്ചു. ഇതിനിടയിൽ രക്ഷപ്പെടാൻ ശ്രമിച്ച പെൺകുട്ടിയെ കുരങ്ങന്മാർ ടെറസിൽനിന്ന് തള്ളുകയായിരുന്നു.

തലയുടെ പിൻഭാഗത്തടക്കം പെൺകുട്ടിക്ക് പരിക്കേറ്റിരുന്നു. ബോധം നഷ്ടമായിരുന്നു. ഉടൻ ആശുപത്രിയിലെത്തിച്ചെങ്കിലും മരിച്ചിരുന്നു.