ബിപിൻ റാവത്തിന്‍റെ മരണം; ജൻമദിനാഘോഷം ഒഴിവാക്കി സോണിയ ഗാന്ധി

ന്യൂഡൽഹി: സംയുക്​ത സൈനിക മേധാവി ബിപിൻ റാവത്തിന്‍റെ മരണത്തിൽ അനുശോചിച്ച്​ കോൺഗ്രസ്​ അധ്യക്ഷ സോണിയ ഗാന്ധി തന്‍റെ ജൻമദിന ആഘോഷം ഒഴിവാക്കി. സോണിയയുടെ 75ാമത്​ ജൻമദിനമായിരുന്നു ഇത്​. കഴിഞ്ഞ ദിവസം തമിഴ്​നാട്​ കൂനൂരിൽ നടന്ന ഹെലികോപ്​ടർ അപകടത്തിലാണ്​ ജനറൽ ബിപിൻ റാവത്തും ഭാര്യയുമടക്കം 13 പേർ മരിച്ചത്​.

പാർട്ടി പ്രവർത്തകരും അനുഭാവികളും അധ്യക്ഷയുടെ ജൻമദിനം ആഘോഷിക്കുന്നതിൽനിന്ന്​ പിൻമാറണമെന്ന്​ കർശന നിർദേശം നൽകിയതായി എ.ഐ.സി.സി ജനറൽ സെക്രട്ടറി കെ.സി വേണുഗോപാൽ അറിയിച്ചു. കോൺഗ്രസ്​ ആസ്​ഥാനത്തും യാതൊരു തരത്തിലുമുള്ള ആഘോഷവും ഉണ്ടാവില്ല.