അധോലോക കുറ്റവാളി ഛോട്ടാ രാജൻ കോവിഡ്​ ബാധിച്ച്​ മരിച്ചുവെന്ന്​ പ്രചാരണം; നിഷേധിച്ച്​ എയിംസ്​ അധികൃതർ

ന്യൂഡൽഹി: ഡൽഹി എയിംസിൽ ചികിത്സയിൽ കഴിയുന്ന അധോലോക കുറ്റവാളി ഛോട്ടാ രാജൻ(61) കോവിഡ്​ ബാധിച്ച്​ മരിച്ചതായി പ്രചാരണം. ദേശീയ മാധ്യമങ്ങൾ ഉൾപ്പെടെ മരണം റിപ്പോർട്ട് ചെയ്​തതോടെ ഇക്കാര്യം നിഷേധിച്ച്​​ എയിംസ്​ അധികൃതരും മുംബൈ പൊലീസും രംഗത്തെത്തി. കഴിഞ്ഞ ഏപ്രിൽ 26നാണ് ഛോട്ടാ രാജനെ എയിംസിൽ പ്രവേശിപ്പിച്ചത്​.

ഇന്തോനേഷ്യയിലെ ബാലിയിൽ നിന്ന് 2015 ൽ അറസ്റ്റിലായ രാജേന്ദ്ര നികൽ​െജ എന്ന​ ഛോട്ടാ രാജൻ ഡൽഹിയിലെ അതീവ സുരക്ഷയുള്ള തിഹാർ ജയിലിൽ കഴിഞ്ഞു വരികയായിരുന്നു.

കൊലപാതകം, കൊള്ള തുടങ്ങിയവയുമായി ബന്ധപ്പെട്ട്​ മഹാരാഷ്​ട്രയിൽ 70ഓളം ക്രിമിനൽ കേസുകളിൽ പ്രതിയാണ്​​ ഛോട്ടാ രാജൻ. മുംബൈയിൽ ഇയാൾക്കെതിരെ നിലനിൽക്കുന്ന എല്ലാ കേസുകളും സി.ബി.ഐക്ക് കൈമാറിയതിനെത്തുടർന്ന് ക്രിമിനൽ കേസുകൾ വിചാരണ ചെയ്യാൻ പ്രത്യേക കോടതി രൂപീകരിച്ചിരുന്നു.

2011ൽ മാധ്യമ പ്രവർത്തകയായ ജ്യോതിർമോയ്​ ഡേയെ കൊലപ്പെടുത്തിയ കേസിൽ കുറ്റവാള​ിയെന്ന്​ കണ്ടെത്തിയതിനെ തുടർന്ന് ഛോട്ടാ രാജനെ 2018ൽ​ കോടതി ജീവപര്യന്തം തടവിന്​ ശിക്ഷിച്ചിരുന്നു.