വാരാണസിയിൽ ലോക്​ഡൗണിലും ഗംഗ ഒഴുകുന്നത്​ പച്ച നിറത്തിൽ; ആശങ്കയിൽ പ്രദേശവാസികൾ

ലഖ്​നോ: ഉത്തർപ്രദേശിലെ വാരാണസിയിൽ ഗംഗ ഒഴുകുന്നത്​ പച്ചനിറത്തിൽ. നിരവധി തീരങ്ങളിൽ പച്ചനിറത്തിൽ വെള്ളം കാണാനാകും. വെള്ളത്തിൽ വിഷമയമായ പദാർഥങ്ങൾ കലർന്നതാകാം നിറം മാറ്റത്തിന്​ കാരണമെന്നാണ്​ ശാസ്​ത്രജ്ഞരുടെ നിഗമനം.

ഗംഗയിലെ വെള്ളത്തി​െൻറ നിറംമാറ്റം പ്രദേശവാസികളെ ആശങ്കയിലാഴ്​ത്തുന്നുണ്ട്​. വാരാണസിലെ 84ഒാളം തീരങ്ങളിൽ പച്ചനിറം കലർന്ന വെള്ളം അടിഞ്ഞതായാണ്​ വിവരം.

'മഴക്കാലത്ത്​ കുളത്തിൽനിന്നും തടാകത്തിൽനിന്നും പായലുകളും പൂപ്പലുകളും ധാരാളമായി എത്തുന്ന​തോടെ ഗംഗയിലെ വെള്ളം ഇളം പച്ചനിറത്തിൽ കാണാറുണ്ട്​. എവിടെയെങ്കിലും വെള്ളം കെട്ടിനിന്നാലും ചെറിയ പായലുകൾ വളരാൻ തുടങ്ങും. കനാലുകളിലും കുളത്തിലും മാത്രം വളരുമെന്നതാണ്​ അതി​െൻറ പ്രത്യേകത. ചെറിയ നദികളിൽനിന്നോ കുളത്തിൽനിന്നോ ഇത്തരം പായലുകൾ ഗംഗയിലെത്തിയാൽ, ഗംഗയിലെ ഒഴുക്ക്​ ശക്തമാകു​േമ്പാൾ അവ ഒഴുകിപോകും. പക്ഷേ, ഇത്രയും ദിവസം അവ വെള്ളത്തിൽ നിൽക്കുകയാ​െണങ്കിൽ അവ ന്യൂറോടോക്​സിൻ മൈക്രോസിസ്​റ്റിൻ പുറത്തുവിടും. ഇത്​ മറ്റു ജലജീവികൾക്ക്​ ഭീഷണിയാകും' -ബനാറസ്​ ഹിന്ദു യൂനിവേഴ്​സിറ്റിയിലെ മാൽവിയ ഗംഗ റിസർച്ച്​ സെൻററി​െൻറ ചെയർമാൻ ബി.ഡി. ത്രിപാദി പറഞ്ഞു.

ജലത്തിലെ പോഷകങ്ങൾ കൂടുന്നതിനാലാണ്​ ആൽഗകളെ ഗംഗയിൽ കാണുന്നതെന്ന്​ പരിസ്​ഥിതി ശാസ്​ത്രജ്ഞനായ ഡോ. കൃപ റാം പറഞ്ഞു. ജലത്തിെൻറ നിറം മാറാൻ മറ്റൊരു കാരണം മഴയായിരിക്കാമെന്നും അദ്ദേഹം കൂട്ടിച്ചേർത്തു.

'മഴയെ തുടർന്ന്​ ആൽഗകൾ ഫലഭൂവിഷ്​ഠമായ ഇടങ്ങളിൽനിന്ന്​ നദിയിലേക്ക്​ ഒഴുകും. ആവശ്യത്തിന്​ പോഷകങ്ങൾ ലഭിക്കുന്നതോടെ പ്രകാശസംശ്ലേഷണം ആരംഭിക്കും. അത്​ വെള്ളത്തിൽ ദീർഘനാൾ നിൽക്കുകയാണെങ്കിൽ സൂര്യപ്രകാശത്തിന്​ മാത്രമേ കടന്നുപോകാൻ സാധിക്കൂ. ഫോസ്​ഫേറ്റ്​, സർഫർ, നൈ​ട്രേറ്റ്​ തുടങ്ങിയ പോഷകങ്ങൾ ആൽഗയെ വളരാനും സഹായിക്കും. കാർഷിക ഭൂമിയിൽനിന്നും മലിനജലത്തിൽനിന്നും ആൽഗകൾക്ക്​ വളരാൻ പോഷകങ്ങൾ ലഭിക്കും' -കൃപ റാം പറഞ്ഞു.

ഇൗ നിറംമാറ്റത്തിൽ ആശങ്കപ്പെടേണ്ട കാര്യമില്ല. ഇത്​ ഒരു സ്വാഭാവിക പ്രക്രിയയാണ്​. മാർച്ച്​ മുതൽ മേയ്​ വരെ ഇതുണ്ടാകും. വെള്ളം വിഷമയമായി മാറുന്നതോടെ കുളിക്കുന്നവർക്കും കുടിക്കുന്നവർക്കും ചില അസുഖങ്ങൾ ബാധി​ച്ചേക്കാമെന്നും അവർ കൂട്ടിച്ചേർത്തു.

2020 ലോക്​ഡൗണിൽ രാജ്യത്തെ നദികളെല്ലാം തന്നെ ശുദ്ധമായിരുന്നു. ​അതി​െൻറ പല റിപ്പോർട്ടുകളും പുറത്തുവന്നിരുന്നു. എന്നാൽ ഇൗ മേയ്​ മാസത്തിലും ലോക്​ഡൗൺ തുടരു​േമ്പാൾ നേരെ മറിച്ചാണ്​ കാര്യങ്ങളെന്നത്​ പ്രദേശവാസികളെ ആശങ്കപ്പെടുത്തുന്നുണ്ട്​.