കൂട്ടബലാത്സംഗത്തിനിരയായ യുവതിയെ തല മൊട്ടയടിച്ച് തെരുവിലൂടെ നടത്തിച്ചു; നാലുപേർ അറസ്റ്റിൽ​ -വിഡിയോ

ന്യൂഡൽഹി: രാജ്യതലസ്ഥാനത്തെ ഞെട്ടിച്ചുകൊണ്ട് വീണ്ടുമൊരു കൂട്ടബലാത്സംഗം. 20 വയസ്സുകാരിയെ കൂട്ടബലാത്സംഗത്തിന് ഇരയാക്കിയ ശേഷം അയൽക്കാർ മുഖത്ത്​ കരിപൂശി, മൊട്ടയടിച്ച് തെരുവിലൂടെ നടത്തിച്ചു. സംഭവത്തിന്‍റെ വിഡിയോ പുറത്തുവന്നതോടെ നാല്​ സ്ത്രീകളെ പൊലീസ്​ അറസ്റ്റ്​ ചെയ്തു.

കിഴക്കൻ ഡൽഹിയിലെ ഷഹ്‌ദാരയിലാണ്​ സംഭവം. വ്യക്തി വൈരാഗ്യമാണ്​ സംഭവത്തിന്​ പിന്നിലെന്നും അന്വേഷണം ആരംഭിച്ചിട്ടുണ്ടെന്നും ഡൽഹി പൊലീസ് അറിയിച്ചു. യുവതിക്ക്​ സാധ്യമായ എല്ലാ സഹായവും കൗൺസിലിങ്ങും നൽകുമെന്നും പൊലീസ്​ കൂട്ടിച്ചേർത്തു.

സംഭവത്തിൽ ഉ​ൾപ്പെട്ട​ കൂടുതൽ കുറ്റവാളികളെ അറസ്റ്റ് ചെയ്യാന്‍ നടപടി സ്വീകരിക്കുന്നതിന്​ പൊലീസിന് കത്തയച്ചിട്ടുണ്ടെന്ന് ഡൽഹി വനിതാ കമീഷൻ അധ്യക്ഷ സ്വാതി മലിവാൾ പറഞ്ഞു. യുവതിയെ സന്ദർശിച്ച അവർ, അനധികൃത മദ്യവിൽപ്പനക്കാർ ചേർന്ന്​ കൂട്ടബലാത്സംഗം ചെയ്യുകയായിരുന്നുവെന്ന്​ വ്യക്തമാക്കി. യുവതിയുടെ മുഖത്ത്​ കരിപൂശി, തല മൊട്ടയടിച്ചു. ചെരുപ്പ്​ മാലയണിയിച്ചാണ്​ അവളെ തെരുവിലൂടെ നടത്തിയതെന്നും മലിവാൾ പറഞ്ഞു. പെൺകുട്ടിക്കും അവളുടെ കുടുംബത്തിനും സുരക്ഷ നൽകാന്‍ പൊലീസിനോട് വനിതാ കമീഷൻ ആവശ്യപ്പെട്ടിട്ടുണ്ട്.

തട്ടിക്കൊണ്ടുപേയി മൂന്നുപേർ ചേർന്നാണ്​ പീഡിപ്പിച്ചതെന്ന്​ യുവതി പറഞ്ഞതായി വനിതാ കമീഷൻ അറിയിച്ചു​. അവിടെയുണ്ടായിരുന്ന സ്ത്രീകൾ തന്നെ ബലാത്സംഗം ചെയ്യാൻ പുരുഷന്മാരെ പ്രേരിപ്പിച്ചതായും യുവതി മൊഴി നൽകിയിട്ടുണ്ട്​. പ്രതികൾ മദ്യവും മയക്കുമരുന്നും വിൽക്കുന്നവരാണെന്നും കമീഷൻ വ്യക്​തമാക്കി.

യുവതിയുമായി പ്രണയത്തിലായിരുന്ന അയൽപക്കത്തെ യുവാവ് കഴിഞ്ഞ നവംബറിൽ ആത്മഹത്യ ചെയ്തിരുന്നു. യുവാവിന്‍റെ ആത്മഹത്യക്ക് ഉത്തരവാദിയാണെന്ന് ആരോപിച്ച് ഇയാളുടെ ബന്ധുക്കളാണ് യുവതിയെ ക്രൂരപീഡനത്തിനിരയാക്കിയത്. യുവാവിന്‍റെ ആത്​മഹത്യക്ക്​ ശേഷം യുവതി വാടക വീട്ടിലേക്ക് മാറിയിരുന്നു. അവിടെനിന്ന് യുവാവിന്‍റെ അമ്മാവൻ അവളെ കൂട്ടിക്കൊണ്ടുപോവുകയായിരുന്നുവെന്ന്​ സഹോദരി പറഞ്ഞു.

സംഭവത്തിന്‍റെ വിഡിയോ പുറത്തുവന്നിട്ടുണ്ട്​. പീഡനത്തിനിരയായ യുവതിയെ ഒരു സ്ത്രീയുടെ നേതൃത്വത്തിലാണ്​ ജനക്കൂട്ടത്തിലേക്ക്​ കൊണ്ടുവരുന്നത്​. ഇവർ യുവതിയെ ചീത്തവിളിക്കുന്നത്​ വിഡിയോയിൽ കാണാം. ഇത്​ കേട്ട്​ കൂടിയിരുന്നവർ കൈയടിക്കുകയും യുവതിയുടെ മുഖത്ത്​ അടിക്കുകയും ചെയ്യുന്നുണ്ട്​.