ഫംഗസ്​ രോഗം ബാധിക്കുന്ന കോവിഡ്​രോഗികളുടെ എണ്ണം വർധിക്കുന്നു; മുന്നറിയിപ്പുമായി മഹാരാഷ്​ട്രയിലേയും ഗുജറാത്തിലേയും ഡോക്​ടർമാർ

ന്യൂഡൽഹി: കോവിഡ്​ രോഗികളിൽ ഫംഗസ്​രോഗബാധ വർധിക്കുന്നുവെന്ന മുന്നറിയിപ്പുമായി മഹാരാഷ്​ട്രയിലേയും ഗുജറാത്തിലേയും ഡോക്​ടർമാർ. ഗുജറാത്തിൽ മാത്രം 100 ഓളം കോവിഡ്​ രോഗികളിൽ ഫംഗസ്​ ബാധ റിപ്പോർട്ട്​ ചെയ്​തിട്ടുണ്ട്​. ഇവർക്കായി പ്രത്യേക വാർഡും ഗുജറാത്തിൽ തുടങ്ങിയിട്ടുണ്ട്​.

ഓക്​സിജൻ ആവശ്യമായി വരുന്ന രോഗികളിൽ ഫംഗസ്​ ബാധ കൂടുതലായി കാണുന്നുവെന്ന്​ റിപ്പോർട്ടുകളുണ്ട്​. ഏകദേശം 9000 രുപ ചെലവ്​ വരുന്ന ഇഞ്ചക്ഷൻ ഫംഗസ്​ രോഗികൾക്ക്​ ആവശ്യമായി വരും. ഫംഗസ് ബാധിച്ചവരില്‍ കണ്ണുകള്‍ വീര്‍ക്കുകയും കാഴ്ച കുറയുകയും ചെയ്യുന്നു. ചികിത്സ നടത്തിയില്ലെങ്കില്‍ കാഴ്ചയെ ഗുരുതരമായി ബാധിച്ചേക്കും.

വിവിധ ആരോഗ്യ പ്രശ്‌നങ്ങള്‍ അലട്ടുന്നവരിലാണ് ഈ ഫംഗസ് ബാധ കൂടുതല്‍ കണ്ടെത്തുന്നത്. കടുത്ത പ്രമേഹ രോഗികളിലാണ് ഈ ഫംഗസ് ബാധ ഏറ്റവും കൂടുതല്‍ അപകടകാരിയാകുന്നതെന്നും ഡോക്ടര്‍മാര്‍ മുന്നറിയിപ്പ് നല്‍കുന്നു. കോവിഡ് ചികിത്സക്ക് സ്റ്റിറോയിഡുകള്‍ ഉപയോഗിച്ചതാണ് അണുബാധ വ്യാപകമാകാന്‍ കാരണമായതെന്നും റിപ്പോര്‍ട്ടുണ്ട്.