ലക്ഷദ്വീപ്​: ആറ്​ ദ്വീപുകളിൽ സമ്പൂർണ അടച്ചിടൽ 14 വരെ നീട്ടി

കവരത്തി: കോവിഡ്​ കേസുകൾ വർധിച്ചുവരുന്ന സാഹചര്യത്തിൽ ലക്ഷദ്വീപ്​ സമൂഹത്തിൽപ്പെട്ട ആറ്​ ദ്വീപുകളിൽ സമ്പൂർണ അടച്ചിടൽ ഈമാസം 14 വരെ നീട്ടി. കവരത്തി, അമിനി, ആ​ന്ത്രോത്ത്​, മിനിക്കോയ്​, കൽപേനി, ബിത്ര എന്നിവിടങ്ങളിലാണ്​ ഇന്ന്​ വൈകീട്ട്​ അഞ്ച്​ മുതൽ ഏഴ്​ ദിവസത്തേക്ക്​ സമ്പൂർണ ലോക്​ഡൗൺ നീട്ടിയത്​. ഇതിൽ ബിത്ര ഒഴികെയുള്ള സ്​ഥലങ്ങളിൽ സമ്പൂർണ ലോക്​ഡൗൺ നിലനിന്നിരുന്നു. ബിത്രയെ ഇന്ന്​ പട്ടികയിൽ ചേർക്കുകയായിരുന്നു. മറ്റ്​ ദ്വീപുകളായ കിൽത്താൻ, ചെത്​ലത്ത്​, കടമത്ത്​, അഗത്തി എന്നിവിടങ്ങളിൽ രാത്രി കർഫ്യൂ തുടരും.

സമ്പൂർണ്ണ ലോക്​ഡൗൺ പ്രഖ്യാപിച്ച്​ ദ്വീപുകളിൽപ്പെട്ട കവരത്തിയിൽ ജില്ലാ കലക്​ടറുടെ അനുമതിയോടെ കടകൾക്ക്​ ഉച്ചക്ക്​ ഒന്ന്​ മുതൽ നാല്​ വരെ പ്രവർത്തിക്കാം. മറ്റ്​ ദ്വീപുകളിലെ കടകൾക്ക്​ ബി.ഡി.ഒമാരുടെ അനുമതിയോടെ ഇതേ സമയങ്ങളിൽ പ്രവർത്തിക്കാം. ഹോട്ടലുകൾക്ക് രാവിലെ 7.30 മുതൽ 9.30 വരെയും ഉച്ചക്ക് 1 മുതൽ 3 വരെയും വൈകീട്ട് 6 മുതൽ 9 വരെയും പ്രവർത്തിക്കാം. പാർസൽ സർവീസ് മാത്രമേ അനുവദിക്കുകയുള്ളു.

ഹോട്ടൽ ജീവനക്കാർ കോവിഡ്​ പരിശോധന നടത്തുകയും പ്രത്യേക പാസ്​ വാങ്ങുകയും വേണം. മത്സ്യ തൊഴിലാളികൾക്കും ഇറച്ചി വിൽക്കുന്നവർക്കും ഹോം ഡെലിവറിയായി ഉച്ചക്ക് 3 മുതൽ 5 വരെ വിൽപന നടത്താം. ഇവരും കോവിഡ്​ പരിശോധന നടത്തുകയും പ്രത്യേക അനുമതി വാങ്ങുകയും വേണം. ഇവർ വാഹനം ഉപയോഗിക്കുന്നു എങ്കിൽ അതിനും പ്രത്യേക അനുമതി വാങ്ങണം. രാത്രി കർഫ്യൂ നിലനിൽക്കുന്ന ദ്വീപുകളിൽ രാവിലെ 7 മുതൽ വൈകീട്ട് 5 വരെ കടകൾ തുറക്കാം. അവശ്യ സർവീസുകൾക്ക് ഇളവുണ്ടാകും.