റഫാൽ കരാറിൽ വ്യക്​തത വേണമെന്ന്​ ആവശ്യപ്പെട്ട്​ ഫ്രഞ്ച്​ എൻ.ജി.ഒയുടെ പരാതി

പാരീസ്: റഫാൽ കരാർ നിബന്ധനകൾ സംബന്ധിച്ച്​ വ്യക്​തത വരുത്തണമെന്ന്​ ആവശ്യപ്പെട്ട്​ ഫ്രഞ്ച്​ എൻ.ജി.ഒ പരാതി നൽകി. 36 റഫാൽ യുദ്ധവിമാനങ്ങൾ ഇന്ത്യക്ക്​ കൈമാറുന്നതിന്​​ എന്ത്​ നിബന്ധനയാണ്​ മുന്നോട്ടുവെച്ചത്​, ദസോ ഏവിയേഷ​​​​െൻറ പങ്കാളിയായി അനിൽ അംബാനിയുടെ റിലയൻസിനെ തെരഞ്ഞെടുത്തതി​​​​െൻറ അടിസ്​ഥാനമെന്ത്​ തുടങ്ങിയ ചോദ്യങ്ങളാണ്​ ഹരജിയിൽ ഉന്നയിച്ചിരിക്കുന്നത്​.

സാമ്പത്തിക കുറ്റകൃത്യങ്ങളിലെ ഇരകള്‍ക്കുവേണ്ടി പ്രവര്‍ത്തിക്കുന്ന ഫ്രഞ്ച്​ എന്‍.ജി.ഒയായ ഷെര്‍പ്പയാണ് ഫ്രാന്‍സിലെ ഫിനാന്‍ഷ്യല്‍ പ്രോസിക്യൂട്ടര്‍ക്ക് പരാതി നല്‍കിയിരിക്കുന്നത്. റഫാല്‍ ഇടപാടില്‍ അഴിമതി നടന്നിട്ടുണ്ടോ, ആര്‍ക്കെങ്കിലും അനര്‍ഹമായ നേട്ടമുണ്ടായോ എന്നും അന്വേഷിക്കണമെന്ന്​ ഏജൻസിയുടെ ആവശ്യപ്പെടുന്നു.

36 റഫാല്‍ വിമാനങ്ങള്‍ വാങ്ങുന്നതിനായി ഫ്രഞ്ച്​ സർക്കാറുമായി ഇന്ത്യയുണ്ടാക്കിയ കരാറാണ്​ വിവാദങ്ങൾക്ക്​ ഇടവച്ചത്​. നേരത്തെ 126 വിമാനങ്ങള്‍ വാങ്ങാന്‍ ഉദ്ദേശിച്ച ഇടപാടിലാണ് പിന്നീട് വിമാനങ്ങളുടെ എണ്ണം 36 ആയി ചുരുങ്ങിയത്. ഇടപാടിൽ വൻ അഴിമതിയുണ്ടെന്നാണ്​ ആരോപണം. ഫ്രഞ്ച് വിമാനനിര്‍മാതാക്കളായ ദസോ ഏവിയേഷനാണ്​ ജെറ്റുകൾ നിർമിക്കുന്നത്​. അതിന്​ ഇന്ത്യയിലെ പങ്കാളിയായി തെരഞ്ഞെടുത്ത റിലയൻസിന്​ വിമാന നിർമാണത്തിൽ മുൻപരിചയമില്ലെന്നത്​ പരിഗണിക്കാതിരുന്നത്​ എന്തുകൊണ്ടെന്നും പ്രതിപക്ഷം ചോദിക്കുന്നു.