നാലാം ഘട്ട ലോക്​ഡൗണിൽ കേന്ദ്രത്തി​െൻറ മാർഗനിർദേശങ്ങളിൽ ഇളവ് വരുത്താൻ കഴിയില്ല

ന്യൂഡൽഹി: കോവിഡ്‌ 19 തടയുന്നതിനായി ലോക്​ഡൗൺ നിയന്ത്രണങ്ങളിൽ കേന്ദ്ര ആഭ്യന്തര മന്ത്രാലയം പരിഷ്കരിച്ച മാർഗനിർദ്ദേശങ്ങൾ പുറപ്പെടുവിച്ചു. ലോക്ക്ഡൗൺ മേയ്​ 31 വരെ നീട്ടിയതിനെ തുടർന്ന് നിയന്ത്രണങ്ങളിൽ വ്യപകമായ ഇളവുകൾ നൽകി.

തിങ്കളാഴ്​ച മുതൽ പ്രാബല്യത്തിൽ വരുന്ന പുതിയ മാർഗനിർദ്ദേശങ്ങൾ പ്രകാരം, സംസ്ഥാനങ്ങളും കേന്ദ്ര ഭരണപ്രദേശങ്ങളും റെഡ്, ഓറഞ്ച്, ഗ്രീൻ മേഖലകളെ കണ്ടെത്തി കൃത്യമായി രേഖപ്പെടുത്തണം. ചുവപ്പ് –ഓറഞ്ച് സോണുകൾക്കുള്ളിൽ സാങ്കേതിക വിവരങ്ങളും പ്രാദേശിക തലത്തിലുള്ള ആരോഗ്യ മാർഗനിർദ്ദേശളും അടിസ്ഥാനമാക്കി, പ്രാദേശിക അധികാരികൾ കണ്ടെയ്ൻമ​​െൻറ്​, ബഫർ സോണുകളും രേഖപ്പെടുത്തണം.

കണ്ടെയ്‌ൻമ​​െൻറ്​ സോണുകളിൽ, മുമ്പത്തെപ്പോലെ കർശന പരിധി നിലനിർത്തി അവശ്യ പ്രവർത്തനങ്ങൾ മാത്രമേ അനുവദിക്കൂ. ചില പരിമിതമായ കാര്യങ്ങളിൽ രാജ്യത്തുടനീളമുള്ള വിലക്കു തുടരും. ആഭ്യന്തര മന്ത്രാലയത്തി​​​െൻറ മാർ‌ഗനിർ‌ദ്ദേശങ്ങൾ‌ പ്രകാരം പ്രത്യേകമായി നിരോധിച്ചിരിക്കുന്നവ ഒഴികെ മറ്റെല്ലാ കാര്യങ്ങളും അനുവദിക്കും.

പുതുക്കിയ മാർ‌ഗനിർ‌ദ്ദേശങ്ങൾ‌ പ്രകാരം ലോക്​ഡൗൺ‌ നിയന്ത്രണങ്ങളിൽ‌ വ്യാപകമായ ഇളവുകൾ‌ നൽകിയിട്ടുണ്ടെങ്കിലും, കേന്ദ്ര ആഭ്യന്തര മന്ത്രാലയത്തി​​​െൻറ മാർ‌ഗനിർ‌ദ്ദേശങ്ങളിലുള്ള‌ നിയന്ത്രണങ്ങൾ‌ ദുർബലപ്പെടുത്താൻ‌ കഴിയില്ലെന്ന്‌ സംസ്ഥാനങ്ങളോടും കേന്ദ്ര ഭരണപ്രദേശങ്ങളോടും കേന്ദ്ര ആഭ്യന്തര മന്ത്രാലയം ആവർത്തിച്ചു വ്യക്‌തമാക്കി. സാഹചര്യം വിശകലനം ചെയ്‌ത്‌ അവശ്യമെന്ന് കരുതുന്ന മറ്റ് ചില പ്രവർത്തനങ്ങൾ സംസ്ഥാനങ്ങൾക്ക്‌ നിരോധിക്കുകയോ നിയന്ത്രണങ്ങൾ ഏർപ്പെടുത്തുകയോ ചെയ്യാമെന്നും മന്ത്രാലയം അറിയിച്ചു.