ഓടിയെത്തിയപ്പോൾ യസീം കണ്ടത്​ തവിടുപൊടിയായ വീടു​ം പിതാവടക്കം കുടുംബത്തിലെ നാലുപേരുടെ മൃതദേഹവും...

മുംബൈ: ആ ദുരന്തകഥ വിവരിക്കു​േമ്പാൾ ഷെയ്ഖ്​​ മുഹമ്മദ്​ യസീമിന് കരച്ചിലടക്കാനാവുന്നില്ല. കനത്ത മഴ തളർത്തിയ മുംബൈ മഹാനഗരത്തിൽ ഗോവണ്ടിയിലെ ശിവാജി നഗറിലുള്ള തങ്ങളുടെ ബഹുനിലവീട്​ നിലംപൊത്തിയപ്പോൾ യസീമിന്​ നഷ്​ടമായത്​ പിതാവ്​ ഉൾപെടെ അടു​ത്ത ബന്ധുക്കളായ നാലുപേരെയാണ്​. സഹോദരനും മാതാവുമടക്കമുള്ളവർക്ക്​ ഗുരുതരമായി പരിക്കേറ്റിരിക്കുന്നു. തന്‍റെ മൊബൈൽ റിപ്പയർ ഷോപ്പിൽ രാത്രി കിടന്നുറങ്ങിയതുകൊണ്ടാണ്​ അപകടത്തിൽനിന്ന്​ യസീം രക്ഷപ്പെട്ടത്​.

'പുലർച്ചെ മൊബൈൽ ഫോൺ അടിക്കുന്നതുകേട്ടാണ്​ ഞാൻ ഉണർന്നത്​. അയൽവാസികളിലൊരാളാണ്​ വിളിച്ചത്​. എത്രയും പെ​ട്ടെന്ന്​ വീട്ടിലേക്ക്​ വരാൻ പറഞ്ഞു. എന്താ​ണ്​ കാര്യമെന്നൊന്നും പറഞ്ഞില്ല. പാതി ഉറക്കത്തിലായിരുന്ന ഞാൻ അപ്പോൾ തന്നെ വീട്ടിലെത്തി. അവിടെയെത്തിയപ്പോൾ കണ്ട കാഴ്ച ഹൃദയം പിളർക്കുന്നതായിരുന്നു. വീട്​ മുഴുവൻ തകർന്നു കിടക്കുന്നു. ചുറ്റും നിലവിളികൾ. പിന്നീട്​ കാണുന്നത്​ പിതാവിന്‍റെയും ബന്ധുക്കളുടെയും മൃതശരീരങ്ങളാണ്​. എന്തു ചെയ്യണമെന്നറിയാതെ ആകെ തകർന്നുനിൽക്കുന്നതിനിടയിലാണ്​ മൃതദേഹങ്ങൾക്കൊപ്പം നടപടിക്രമങ്ങൾക്കായി പോകുന്നതിന്​ പൊലീസ്​ എന്നെ ആംബുലൻസിൽ കയറ്റിയത്​' -കരഞ്ഞുകൊണ്ട്​ യസീം പറഞ്ഞു.

വെള്ളിയാഴ്ച പുലർച്ചെയായിരുന്നു അപകടം. നാലു പേർ മരിച്ച ദുരന്തത്തിൽ 11പേർക്കാണ്​ പരിക്കുപറ്റിയത്​. യസീം തന്‍റെ സമയം അധികവും ചെലവഴിച്ചിരുന്നത്​ കടയിലായിരുന്നു. ഭക്ഷണം കഴിക്കാനും മറ്റ്​ അത്യാവശ്യ കാര്യങ്ങൾക്കുമായി ഇടക്കിടെ വീട്ടിലെത്തും. 'ഈ രണ്ടുനില വീട്​ കുറച്ചുവർഷങ്ങൾക്കു മുമ്പാണ്​ ഞങ്ങളുടെ കുടുംബം വാങ്ങിയത്​. അതാണിപ്പോൾ ചീട്ടുകൊട്ടാരം പോലെ തകർന്നിരിക്കുന്നത്​. വീടു തകർന്ന്​ വീണ്​ അയൽപക്കത്തെ ചില വീടുകൾക്കും കേടുപാടുകൾ സംഭവിച്ചു. അയൽക്കാരിൽ ചിലർക്ക്​ പരിക്കേൽക്കുകയും ചെയ്​തിട്ടുണ്ട്​'- രാജവാഡി ഹോസ്​പിറ്റലിന്‍റെ അത്യാഹിത വിഭാഗത്തിന്​ പുറത്തിരുന്ന്,​ 40കാരനായ യസീം പറഞ്ഞു.

'കഴിഞ്ഞ രാത്രിയിൽ എന്‍റെ കുടുംബം മുഴുവൻ വീട്ടിലുണ്ടായിരുന്നു. താഴ​ത്തെ നിലയിലാണ്​ മാതാവും കസിൻസും കിടന്നുറങ്ങിയത്​. സഹോദരൻ പർവേസ്​ ഷെയ്​ഖും അവന്‍റെ ഭാര്യയും മറ്റൊരു കസിനും ഒന്നാം നിലയിലും പിതാവ്​ സബീർ ഷെയ്​ഖ്​ രണ്ടാം നിലയിലുമായിരുന്നു. കെട്ടിടം തകർന്നപ്പോൾ പിതാവും രണ്ടു കസിൻസും സഹോദര ഭാര്യയുമാണ്​ മരിച്ചത്​. സോഫ ബിസിനസ്​ നടത്തുന്ന പർവേസിന്​ ഗുരുതരമായി പരിക്കേറ്റു. ഇരുമ്പുകമ്പികൾ ഉൾപ്പെടെ അവശിഷ്​ടങ്ങൾ അവന്‍റെ നെഞ്ചിലാണ്​ പതിച്ചത്​. മാതാവിന്​ കാലിനാണ്​ പരിക്കേറ്റത്​'- യസീം പറഞ്ഞു.