മുൻ കേന്ദ്രമന്ത്രിയും കോൺഗ്രസ് നേതാവുമായ ഓസ്​കർ ഫെർണാണ്ടസ് എം.പി അന്തരിച്ചു

ന്യൂഡൽഹി: മുതിർന്ന കോൺഗ്രസ് നേതാവും രാജ്യസഭാംഗവും മുൻ കേന്ദ്രമന്ത്രിയുമായ ഉഡുപ്പി അമ്പൽപാടിക്കടുത്ത ബ്രഹ്മഗിരിയിലെ ഡോറിസ് റസ്റ്റ് ഹെവനിൽ ഓസ്കർ ഫെർണാണ്ടസ് (80) അന്തരിച്ചു. ഉച്ചകഴിഞ്ഞ് രണ്ടേമുക്കാലോടെ മംഗളൂരു യേനെപോയ ആശുപത്രിയിലായിരുന്നു അന്ത്യം. ജൂലൈ 17ന്​ രാവ​ിലെ മംഗളൂരു അത്താവരയിലെ ഫ്ലാറ്റിൽ യോഗ ചെയ്യുന്നതിനിടെ വീണ്​ പരിക്കേറ്റതിനെ തുടർന്ന്​ ചികിത്സയിലായിരുന്നു.

വീണപ്പോൾ പരിക്ക്​ സാരമായി തോന്നാതിരുന്നതിനാൽ ഓസ്​കർ ഫെർണാണ്ടസ്​ ആദ്യം ചികിത്സ തേടിയിരുന്നില്ല. വൃക്ക രോഗത്തെ തുടർന്നു ഡയാലിസിസ് ചെയ്തിരുന്നതിനാൽ അന്ന്​ വൈകീട്ട് ഡയാലിസിസ് ചെയ്തതിനു പിന്നാലെ ആശുപത്രിയിൽ കുഴഞ്ഞു വീഴുകയായിരുന്നു. തുടർന്നു പരിശോധിച്ചപ്പോഴാണു രാവിലത്തെ വീഴ്ചയിൽ ഇടിച്ച് തലയിൽ രക്തം കട്ടപിടിച്ചതായി കണ്ടെത്തിയത്​. തുടർന്ന്​ വെന്‍റിലേറ്ററിൽ പ്രവേശിപ്പിക്കുകയായിരുന്നു. ദിവസങ്ങളോളം വെന്‍റിലേറ്ററിൽ കഴിഞ്ഞ ശേഷം ശസ്ത്രക്രിയ നടത്തിയതിനെ തുടർന്ന് ആരോഗ്യനിലയിൽ നേരിയ പുരോഗതി ഉണ്ടായിരുന്നെങ്കിലും തിങ്കളാഴ്ച ഉച്ചയോടെ നില വീണ്ടും വഷളാവുകയായിരുന്നു.

മൻമോഹൻ സിങ്ങിന്‍റെ നേതൃത്വത്തിലുള്ള യു.പി.എ സർക്കാരിൽ സഹമന്ത്രിയായും കാബിനറ്റ് മന്ത്രിയായും ഒസ്​കർ ഫെർണാണ്ടസ്​ പ്രവർത്തിച്ചിട്ടുണ്ട്​. ഗതാഗതം, ദേശീയപാത, തൊഴിൽ, സ്റ്റാറ്റിസ്റ്റിക്‌സ്, പ്രോഗ്രാം ഇംപ്ലിമെ​േന്‍റഷൻ, ഓവർസീസ് ഇന്ത്യൻ അഫയേർസ്, യുവജനകാര്യം, സ്പോർട്സ് തുടങ്ങിയ വകുപ്പുകളാണ്​ കൈകാര്യം ചെയ്തത്​. 17 വർഷം ലോക്സഭാംഗമായി. 23 വർഷമായി രാജ്യസഭാംഗമാണ്. 1980ൽ ഉഡുപ്പിയിൽ നിന്ന് ഏഴാം ലോക്സഭയിലേക്ക് കന്നിവിജയം നേടിയ ഓസ്കർ 1984,1989,1991,1996 തെരഞ്ഞെടുപ്പുകളിലും ഈ മണ്ഡലത്തിൽ നിന്ന് വിജയിച്ചിരുന്നു. 2004 മുതൽ 2009 വരെയാണ് കേന്ദ്ര മന്ത്രിയായത്.

രാജീവ്ഗാന്ധി പ്രധാനമന്ത്രി ആയപ്പോൾ അദ്ദേഹത്തിന്‍റെ പാർലമെന്‍ററി സെക്രട്ടറി ആയിരുന്നു. ഇന്ദിരാഗാന്ധിയുടെ കാലത്ത് എ.ഐ.സി.സി ജോയിന്‍റ്​ സെക്രട്ടറിയായിരുന്നു. രണ്ട്​ തവണ കർണാടക പി.സി.സി പ്രസിഡന്‍റ്​, 1985ലും 1996 മുതൽ മരണം വരെയും എ.ഐ.സി.സി ജനറൽ സെക്രട്ടറി എന്നീ ചുമതലകൾ വഹിച്ചു. വിവിധ പാർലമെന്‍റ്​സമിതികളുടെ അധ്യക്ഷനായും അംഗമായും പ്രവർത്തിച്ചിട്ടുണ്ട്.

1941 മാർച്ച് 27ന് ഉഡുപ്പിയിലെ പ്രമുഖ ക്രൈസ്തവ കുടുംബത്തിൽ റൊക്വെ ഫെർണാണ്ടസിന്‍റെയും ലിയോനിസ ഫെർണാണ്ടസിന്‍റെയും മകനായാണ് ഓസ്കർ ജനിച്ചത്. എൽ.ഐ.സിയിൽ ക്ലർക്ക് ആയി ഔദ്യോഗിക ജീവിതം ആരംഭിച്ചു. ഉഡുപ്പി നഗരസഭാംഗമായാണു തെരഞ്ഞെടുപ്പ് രാഷ്​ട്രീയത്തിൽ തുടക്കം. യങ് ഇന്ത്യൻ, നാഷനൽ ഹെറാൾഡ് പത്രത്തിന്‍റെ മാതൃസ്ഥാപനമായ ദി അസോസിയേറ്റ് ജേണൽസ് പ്രൈവറ്റ് ലിമിറ്റഡിന്‍റെ ഡയറക്ടറായിരുന്നു. രണ്ട്​ തവണ ബംഗളൂരു ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് കൗൺസിൽ അംഗമായി. 2010ൽ മംഗളൂരു സർവകലാശാല ഓണററി ബിരുദം നൽകി ആദരിച്ചിട്ടുണ്ട്​. ഭാര്യ: ബ്ലോസം ഫെർണാണ്ടസ്. മക്കൾ: ഓഷൻ, ഒഷാനി. മരുമക്കൾ: പ്രസിൽ ക്വാഡ്രസ്, മാർക് സൽദാന.