വി​േദ്വഷ പ്രസംഗം; രാജസ്​ഥാൻ മുൻ ബി.ജെ.പി എം.എൽ.എക്കും അനുയായികൾക്കുമെതിരെ കേസ്​

ജയ്​പൂർ: രാജസ്​ഥാനിൽ വിദ്വേഷ പ്രസംഗം നടത്തിയ ബി.ജെ.പി മുൻ എം.എൽ.എക്കും ഒമ്പതുപേർക്കുമെതിരെ കേസ്​. മുൻ എം.എൽ.എ ഗ്യാൻ ദേവ്​ അഹൂജക്കെതിരെയാണ്​ പൊലീസ്​ കേസ്​ രജിസ്റ്റർ ചെയ്​തത്​.

ജൂലൈ മൂന്നിന്​ രാജസ്​ഥാനിലെ ആൽവാർ ജില്ലയിൽ കൂട്ടബലാത്സംഗത്തിന്​ ഇരയായ പെൺകുട്ടിയുടെ ഗ്രാമം സന്ദർശിക്കുന്നതിനിടെയായിരുന്നു വിദ്വേഷ പ്രസംഗം.

ഗ്രാമത്തിലെത്തിയ അഹൂജയും സംഘവും പ്രകോപന പ്രസംഗം നടത്തുകയും ഗ്രാമത്തിലെയും സമീപപ്രദേശങ്ങളിലും താമസിക്കുന്ന മുസ്​ലിം ജന വിഭാഗത്തെ കൊല്ലുമെന്ന്​ ഭീഷണിപ്പെടുത്തുകയുമായിരുന്നുവെന്ന്​ ജൂലൈ ഏഴിന്​ രജിസ്റ്റർ ചെയ്​ത എഫ്​.ഐ.ആറിൽ പറയുന്നു.

പ്രദേശിക അഭിഭാഷകനായ ആസ്​ മുഹമ്മദ്​ ഖാനിന്‍റെ പരാതിയിലാണ്​ നടപടി. ഗ്രാമത്തിന്​ സമീപം ജൂലൈ 25ന്​ 5000 മുതൽ 10,000 വരെ ആളുകൾ ഒത്തുകൂടുമെന്നും വടി, വാൾ, തോക്ക്​ തുടങ്ങിയവ അവരുടെ കൈവശമുണ്ടാകുമെന്നും അഹൂജ പ്രസംഗത്തിൽ പറഞ്ഞതായി എഫ്​.ഐ.ആറിൽ പറയുന്നു.

അഹൂജയുടെ പ്രസംഗത്തിന്‍റെ വിഡിയോ പുറത്തുവന്നിരുന്നു. ജൂലൈ 25ന്​ ഹിന്ദു റാലി സംഘടിപ്പിക്കണമെന്നായിരുന്നു ആഹ്വാനം.

അതേസമയം, രാഷ്​ട്രീയ സമ്മർദ്ദത്തിന്‍റെ ഭാഗമായാണ്​ തനിക്കെതിരെ എഫ്​.ഐ.ആർ രജിസ്റ്റർ ചെയ്​തതെന്നായിരുന്നു അഹൂജയുടെ ആരോപണം.