മുൻ ഐ.പി.എസ്​ ഉദ്യോഗസ്​ഥൻ കെ. അണ്ണാമലൈ തമിഴ്​നാട്​ ബി.ജെ.പി അധ്യക്ഷൻ

ന്യൂഡൽഹി: ഐ.പി.എസ്​ പദവി ഉപേക്ഷിച്ച്​ രാഷ്​ട്രീയക്കാരനായ കെ. അണ്ണാമലൈ ബി.ജെ.പി തമിഴ്​നാട്​ ഘടകം അധ്യക്ഷനാകും. എൽ. മുരുഗൻ കേന്ദ്ര സഹമന്ത്രിയായ ഒഴിവിലാണ്​ നിയമനം. തമിഴ്​നാട്​ ബി.ജെ.പി അധ്യക്ഷ പദവിയിലെത്തുന്ന ഏറ്റവും പ്രായംകുറഞ്ഞ വ്യക്തിയാണ്​ 37കാരനായ അണ്ണാമലൈ. പാർട്ടിയിൽ ചേർന്ന്​ ഒരു വർഷത്തിനുള്ളിൽ ഒരാൾ സംസ്​ഥാന അധ്യക്ഷ പദവിയിൽ എത്തുന്നതും ഇതാദ്യമായാണ്​.

കാരൂർ ജില്ലയിലെ കർഷക കുടുംബത്തിൽ ജനിച്ച അണ്ണാമലൈ ഗൗണ്ടർ സമുദായാംഗമാണ്​. കാരൂർ ഉൾപെടുന്ന കൊങ്ങു പ്രദേശത്ത്​ ബി.ജെ.പിക്ക്​ ശക്തമായ സാന്നിധ്യമുണ്ട്​.

സഖ്യകക്ഷിയായ അണ്ണാ ഡി.എം.കെയുടെ പിന്തുണ കൂടിയുള്ള അണ്ണാമലൈ നിയമസഭ തെരഞ്ഞെടുപ്പിൽ സ്വന്തം ജില്ലയിലെ തന്നെ അറവക്കുറിച്ചിയിൽ ഡി.എം.കെയുടെ ആർ. ഇള​ങ്കോയോട്​ 24,816 വോട്ടി​നാണ്​ തോറ്റത്​. ​

കോയമ്പത്തൂരിലെ പ്രശസ്​തമായ കോളജിൽ നിന്നും എൻജിനിയറിങ്​ പാസായ അണ്ണാമലൈ ​ഐ.ഐ.എം ലഖ്​നോവിൽ നിന്ന്​ എം.ബി.എ ബിരുദവും കരസ്​ഥമാക്കിയിട്ടുണ്ട്​. കഴിഞ്ഞ വർഷം ആഗസ്റ്റിൽ ബി.ജെ.പിയിൽ ചേർന്ന അണ്ണാമലൈ നിലവിൽ സംസ്​ഥാന വൈസ്​ പ്രസിഡന്‍റാണ്​.

കർണാടക കേഡർ 2011 ബാച്ച്​ ഐ.പി.എസ്​ ഉദ്യോഗസ്​ഥനായ അണ്ണാമലൈ ചികമഗളൂരു, ഉഡുപ്പി ജില്ലകളിൽ പൊലീസ്​ സൂപ്രണ്ടായി സേവനമനുഷ്​ടിച്ചിട്ടുണ്ട്​. ബംഗളൂരു സൗത്ത്​ ഡെപ്യൂട്ടി പൊലീസ്​ കമീഷണറുമായിരുന്നു. 2019 സെപ്​റ്റംബറിലാണ്​ പൊലീസ്​ കുപ്പായം ഉപേക്ഷിച്ചത്​.