മുൻമുഖ്യമന്ത്രി ജഗൻമോഹൻ റെഡ്ഡി മാസം 50 മുതൽ 60 കോടി വരെ കൈക്കൂലി വാങ്ങിയിരുന്നതായി ആന്ധ്രാ പൊലീസിന്റെ കുറ്റപത്രം

അമരാവതി: 3500 കോടിയുടെ അഴിമതി ആരോപിക്കുന്ന ആന്ധ്രയിലെ മദ്യകുംഭകോണത്തിൽ മുൻ മുഖ്യമന്ത്രി വൈ.എസ്. ജഗൻമോഹൻ റെഡ്ഡി മാസം 50 മുതൽ 60 കോടിവരെ കൈക്കൂലി വാങ്ങിയിരുന്നതായി ആന്ധ്രാ പൊലീസ് സമർപ്പിച്ച കുറ്റപത്രത്തിൽ ആരോപിക്കുന്നു. ക്രൈം ഇൻവെസ്റ്റിഗേഷൻ ഡിപ്പാർട്​മെന്റ് വിജയവാഡ കോടതിയിൽ സമർപ്പിച്ച കുറ്റപത്രത്തിലാണ് ഗുരുതരമായ ആരോപണം.

എന്നാൽ കേസിൽ ഇതുവരെ ജഗനെ പ്രതി ചേർത്തിട്ടില്ല. എന്നാൽ കേസ് ഇല്ലായ്മയിൽ നിന്ന് കെട്ടിച്ചമച്ച കഥയാണെന്ന് വൈ.എസ്.ആർ കോൺഗ്രസ് നോതാവായ ജഗൻമോഹൻ റെഡ്ഡി ആരോപിക്കുന്നു.

‘ശേഖരിച്ച പണം കേശി റെഡ്ഡി രാജ​ശേഖർ റെഡ്ഡിക്ക് കൈമാറി. രാജശേഖർ റെഡ്ഡി അത് വിജയ് സായി റെഡ്ഡിക്ക് കൈമാറി. അ​ദ്ദേഹം മുഥുൻ റെഡ്ഡിക്ക്, മിഥുൻ റെഡ്ഡി ബാലാജിക്ക്, ഒടുവിൽ ബാലാജിയാണ് വൈ.എസ്. രാജശേഖര റെഡ്ഡിക്ക് നൽകുന്നത്. -കുറ്റപത്രം ആരോപിക്കുന്നു. മാസം അറുപതോളം കോടിയാണത്രെ പിരിക്കുന്നത്.

വൻ കോടികളുടെ അഴിമതിക്ക് ചുക്കാൻ പിടിച്ചത് ജഗനാണെന്നാണ് ക​ണ്ടെത്തൽ. ജഗൻ മദ്യനയത്തിൽ മാറ്റം വരുത്താനായി സ്വാധീനം ചെലുത്തി, ഓട്ടോമേറ്റഡ് ഓർഡർ സപ്ലൈയിൽ തിരിമറി നടത്തി, ത​ന്റെ ഇഷ്ടക്കാരെ ബിവറേജസ് കോർപ​റേഷനിൽ നിയമിച്ചു തുടങ്ങിയവയാണ് ആരോപണങ്ങൾ.

ജഗൻ ഷെൽ ഡിസ്റ്റിലറികൾ ഉണ്ടാക്കി മറ്റൊരു കുറ്റാരോപിതനായ ബാലാജി ഗോവിന്ദപ്പ വഴി പണം കൈപ്പറ്റിയതായും കുറ്റപത്രം ആരോപിക്കുന്നു.

എന്നാൽ പലരെയും നിർബന്ധിച്ചും ക്രൂരമായി പീഡിപ്പിച്ചും ​കൈക്കൂലി നൽകിയുമാണ് കുറ്റപത്രമുണ്ടാക്കിയതെന്ന് ജഗൻമോഹൻ ആരോപിക്കുന്നു. അതേസമയം മുഖ്യമന്ത്രി ചന്ദ്രബാബു നായിഡു നിലവിൽ 2014-19 ൽ നടന്ന മദ്യകുംഭകോണത്തിലെ പ്രതിയാണെന്നും അതിപ്പോഴും കോടതിയിൽ നിലനിൽക്കുകയയാണെന്നും ജഗൻമോഹൻ റെഡ്ഡി ആരോപിച്ചു.