'ഐറ്റം' പരാമർശം പേര്​ മറന്നുപോയതിനാൽ; വിവാദത്തിൽ വിശദീകരണവുമായി കമൽനാഥ്​

ഭോപാൽ: മധ്യപ്രദേശ് ഉപതെര​ഞ്ഞെടുപ്പിൽ മത്സരിക്കുന്ന ബി.ജെ.പി സ്​ഥാനാർഥിക്കെതിരെ സ്​ത്രീ വിരുദ്ധ പരാമർശം നടത്തിയ മുൻ മുഖ്യമന്ത്രിയും കോൺഗ്രസ്​ നേതാവുമായ കമൽനാഥ്​ വിശദീകരണവുമായി രംഗത്ത്​.

ബി.ജെ.പി സ്​ഥാനാർഥിയുടെ ​പേര്​ മറന്നുപോയതിനാലാണ്​ ​'ഐറ്റം' എന്ന്​ വിശേഷിപ്പിച്ചതെന്ന്​ അ​ദ്ദേഹം പറഞ്ഞു. 'ഞാൻ ചിലത്​ പറഞ്ഞു. എന്നാൽ അത്​ ആരെയും അപമാനിക്കാൻ വേണ്ടിയല്ല. ഞാൻ ഇമാർതി ദേവിയുടെ പേര്​ മറന്നുപോയിരുന്നു. പട്ടികയിൽ ഐറ്റം നമ്പർ വൺ, ഐറ്റം നമ്പർ രണ്ട്​ എന്നിങ്ങനെ പറയുന്നു. അ​െതങ്ങനെ അപമാനിക്കലാകും' -കമൽനാഥ്​ ചോദിച്ചു.

കോൺഗ്രസ്​ സ്​ഥാനാർഥി സുരേഷ്​ രാജിന്​ വേണ്ടി ദാബ്രയിൽ പ്രചരണ റാലിയെ അഭിസംബോധന ചെയ്​ത്​ സംസാരിക്കു​േമ്പാഴായിരുന്നു കമൽ നാഥി​െൻറ വിവാദ പരാമർശം. 'ഞങ്ങളുടെ സ്​ഥാനാർഥി അവളെപോലെയല്ല... അവളുടെ പേര്​ എന്താണ്​? നിങ്ങൾക്ക്​ അവളെ നന്നായി അറിയാം, നേരത്തേ എനിക്ക്​ മുന്നറിയിപ്പ്​ നൽകേണ്ടതായിരുന്നു... എന്തൊരു​ ഐറ്റമാണത്​'' എന്നായിരുന്നു കമൽനാഥിനെ പരാമർശം.

ഉപതെര​ഞ്ഞെടുപ്പിലെ ബി​.ജെ.പി സ്​ഥാനാർഥി ഇമാർതി​ ദേവിക്കെതിരെയായിരുന്നു പ്രസ്​താവന. വിവാദ പരാമർശത്തിന്​ പിന്നാലെ ബി.ജെ.പി ​തെരഞ്ഞെടുപ്പ്​ കമീഷന്​ പരാതി നൽകി. സംഭവത്തിൽ കേന്ദ്ര തെരഞ്ഞെടുപ്പ്​ കമീഷൻ വിശദ റിപ്പോർട്ട്​ തേടുകയും ചെയ്​തു.