ബാരാമുല്ല ഏറ്റുമുട്ടലിൽ കൊല്ലപ്പെട്ട രണ്ട്​ ഭീകരരിൽ ഒരാൾ ജയ്​ഷെയിൽ ചേർന്ന ഫുട്​ബാൾ താരം

ന്യൂഡൽഹി: ഉത്തര കശ്​മീരിലെ ബാരാമുല്ല ജില്ലയിൽ വ്യാഴാഴ്ച സുരക്ഷാസേനയുമായി നടന്ന ഏറ്റുമുട്ടലിൽ കൊല്ലപ്പെട്ട രണ്ടു ഭീകരരിൽ ഒരാൾ ഫുട്​ബാൾ താരം. സോപോർ സ്വദേശി ആമിർ സിറാജ്​ എന്ന കോളജ്​ വിദ്യാർഥിയാണ്​ ഇയാളെന്ന്​​ ജമ്മുകശ്​മീർ പൊലീസ് അറിയിച്ചു​.

പാകിസ്​താൻ സ്വദേശി അബ്​റാർ എന്ന ലൻഗൂ ആണ്​ കൊല്ലപ്പെട്ട മറ്റൊരാൾ. ഇരുവരും ജയ്​ഷെ മുഹമ്മദ്​ എന്ന തീവ്രവാദ സംഘടനയുടെ ഭാഗമായി പ്രവർത്തിച്ചു വരുന്നവരാണ്​. ആമിർ സിറാജ്​ ഈ അടുത്ത കാലത്തായാണ്​ ജയ്​ഷെ മുഹമ്മദിൽ ചേർന്നത്​. ക്രീരി ബാരാമുല്ല വെടിവെപ്പിലാണ്​​ ഇരുവരും കൊല്ലപ്പെട്ടത്​. ഹമാമിൽ നിന്നാണ്​ ഇവരുടെ മൃതദേഹം കണ്ടെടുത്തത്​.

ജൂ​ലൈ രണ്ട്​ മുതൽ ആമിറിനെ കാണാതായിരുന്നു. സോപോറ ആദിപോറയിലെ മാതൃസഹോദരന്‍റെ വീട്ടിൽ പോയി ഫുട്​ബാൾ കളിക്കാനെന്നും പറഞ്ഞ്​ ഇറങ്ങിയ ആമിർ പിന്നീട്​ വീട്ടിലേക്ക്​ മടങ്ങിയെത്തിയിരുന്നില്ല. പിന്നീടാണ്​ ഇയാൾ ജയ്​ഷെ മുഹമ്മദിൽ ചേർന്നതായി വിവരം ലഭിക്കുന്നത്​. ആമിറിന്​ നേരത്തേ തീവ്രവാദ ബന്ധങ്ങളൊന്നുമില്ലായിരുന്നുവെന്നും എന്നാൽ നിരവധി പേർ ഭീകരവാദ പ്രവർത്തനങ്ങളുമായി ബന്ധപ്പെട്ട്​ പ്രവർത്തിക്കുന്ന സോപോറിലെ ആദിപോറ മേഖലയിൽ നിന്നാണ്​ ഇയാൾ വരുന്നതെന്നും പൊലീസ്​ ഓഫിസർ പറഞ്ഞു.

ബാരാമുല്ലയിലെ വാനിഗാം മേഖലയി​ൽ വ്യാഴാഴ്ചയാണ്​ ആമിർ ഉൾപ്പെടെ രണ്ട്​ ഭീകരർ കൊല്ലപ്പെട്ട ഏറ്റുമുട്ടൽ നടന്നത്​. ഭീകര സാന്നിധ്യമുള്ളതായ രഹസ്യ വിവരത്തിന്‍റെ അടിസ്ഥാനത്തിൽ ബാരാമുല്ല പൊലീസും 29 രാഷ്​ട്രീയ റൈഫിൾസും 176 ബറ്റാലിയൻ സി.ആർ.പി.എഫും സംയുക്തമായി തെരച്ചിൽ നടത്തുകയായിരുന്നു.

മേഖലയിലെ ഒരു വീട്ടിൽ ഭീകരർ ഒളിച്ചിരിപ്പുണ്ടെന്ന്​ തിരിച്ചറിഞ്ഞ സുരക്ഷാസേന അവർക്ക്​ കീഴ​ടങ്ങാനുള്ള അവസരം നൽകി. എന്നാൽ ഇത്​ സ്വീകരിക്കാതെ ഭീകരർ സുരക്ഷാസേനക്ക്​ നേരെ വെടിയുതിർക്കുകയായിരുന്നു. തുടർന്ന്​ സേന തിരിച്ചടിക്കുകയും ഏറ്റുമുട്ടലിലേക്ക്​ നീങ്ങുകയും ചെയ്​തു. ഏറ്റുമുട്ടലിനൊടുവിലാണ്​ ഇരുവരും കൊല്ലപ്പെടുന്നത്​. ഇവരിൽ നിന്ന്​ ആയുധങ്ങളും സ്​ഫോടക വസ്​തുക്കളും പിടിച്ചെടുത്തിട്ടുണ്ട്​.

ആമിറിനെ പോലെ അനന്ത്​നാഗിലെ ജില്ലാതല ഫുട്​ബാൾ താരമായ മാജിദ്​ ഖാൻ എന്ന 27കാരൻ 2017ൽ ഭീകര സംഘടനയായ ലഷ്​കർ ഇ ത്വയിബയിൽ ചേർന്നിരുന്നുവെന്നും എന്നാൽ അധികം വൈകാതെ തന്നെ ഇയാൾ കീഴടങ്ങുകയായിരുന്നുവെന്നും ഒരു പൊലീസ്​ ഓഫിസർ പറഞ്ഞു.