ലോക്​ഡൗൺ ജില്ലകളിൽ മാത്രം; അന്തർ സംസ്ഥാന യാത്രകൾക്ക്​ നിയന്ത്രണമല്ലെന്ന്​ കേന്ദ്രസർക്കാർ

ന്യൂഡൽഹി: രാജ്യത്ത്​ ലോക്​ഡൗൺ ഏർപ്പെടുത്തുകയാണെങ്കിൽ അത്​ ജില്ലാതലത്തിൽ മാത്രമായിരിക്കുമെന്ന്​ കേന്ദ്രസർക്കാർ. സംസ്ഥാനതലത്തിൽ ലോക്​ഡൗൺ ഏർപ്പെടുത്താൻ ഇപ്പോൾ തീരുമാനിച്ചിട്ടില്ല. കോവിഡ്​ ടെസ്റ്റ്​ വർധിപ്പിച്ച്​ രോഗികളെ കണ്ടെത്തുന്നതിനും അവരെ ചികിത്സിക്കുന്നതിനുമാണ്​ ഇപ്പോൾ പ്രാധാന്യം നൽകുന്നതെന്നും കേന്ദ്രസർക്കാർ അറിയിച്ചു. ഏപ്രിൽ ഒന്ന്​ മുതൽ നിലവിൽ വരുന്ന പുതിയ കോവിഡ്​ മാർഗനിർദേശങ്ങളിലാണ്​ ഇതുസംബന്ധിച്ച പ്രഖ്യാപനമുള്ളത്​.

സംസ്ഥാനത്തിനുള്ളിലോ സംസ്ഥാനങ്ങൾക്കിടയിലോ ഉള്ള യാത്രകൾക്ക്​ യാതൊരു നിയന്ത്രണവും ഉണ്ടാവില്ല. ഇതിന്​ പ്രത്യേക അനുമതിയോ ഇ-പാസോ ആവശ്യമില്ലെന്നും കേന്ദ്രസർക്കാർ വ്യക്​തമാക്കുന്നു.

ആർ.ടി.പി.സി.ആർ ടെസ്റ്റുകളുടെ എണ്ണം വർധിപ്പിക്കണമെന്നും നിർദേശമുണ്ട്​. ആകെ നടത്തുന്ന ടെസ്റ്റുകളിൽ 70 ശതമാനവും ആർ.ടി.പി.സി.ആർ ടെസ്റ്റുകളാവണം. കോവിഡ്​ വ്യാപനം കൂടുതലുള്ള പ്രദേശങ്ങളിൽ കർശന നിയന്ത്രണം ഏർപ്പെടുത്താൻ പ്രാദേശിക ഭരണകൂടങ്ങൾ ശ്രദ്ധിക്കണമെന്നും അധികൃതർ വ്യക്​തമാക്കുന്നു.