വിമാനത്തിനുള്ളിൽ ബീഡി വലിച്ചയാൾ അറസ്റ്റിൽ

ന്യൂഡൽഹി: ബംഗളൂരിലേക്കുള്ള ആകാശ എയർ വിമാനത്തിൽ ബീഡിവലിച്ചയാൾ പിടിയിൽ. ആദ്യമായി വിമാനയാത്ര നടത്തിയ 56കാരനാണ് ബംഗളൂരിവിലെ കേംപഗൗഡ വിമാനത്താവളത്തിൽ പിടിയിലായത്. വിമാനം ലാൻഡ് ചെയ്തയുടൻ വിമാന കമ്പനിയുടെ എയർപോർട്ട് ഡ്യൂട്ടി മാനേജർ നൽകിയ പരാതിയുടെ അടിസ്ഥാനത്തിലാണ് അറസ്റ്റ്.

രാജസ്ഥാനിലെ മാർവാറിൽ നിന്നുള്ള പ്രവീൺ കുമാറാണ് പിടിയിലായത്. അഹമ്മദാബാദിൽ നിന്നാണ് ഇയാൾ വിമാനത്തിൽ കയറിയത്. യാത്രക്കിടെ ടോയ്‍ലറ്റിനുള്ളിൽ നിന്ന് ബീഡി വലിച്ചതിനാണ് വിമാന ജീവനക്കാർ ഇയാൾക്കെതിരെ പരാതി നൽകിയത്. ആദ്യമായി വിമാന യാത്ര നടത്തിയ ആളാണ് പ്രവീൺ കുമാറെന്നും നിയമങ്ങളെ കുറിച്ച് ഇയാൾക്ക് അറിവുണ്ടായിരുന്നില്ലെന്നും ബംഗളൂരു ​പൊലീസ് അറിയിച്ചു.

താൻ സാധാരണ ട്രെയിനിൽ പോകു​മ്പോൾ പുകവലിക്കാറുണ്ടായിരുന്നു. ഇതു തന്നെയാണ് വിമാനത്തിലും ആവർത്തിച്ചതെന്ന് പ്രവീൺ കുമാർ പൊലീസിനോട് വെളിപ്പെടുത്തിയെന്നാണ് റിപ്പോർട്ട്. നേരത്തെ വിമാനത്തിൽ സിഗരറ്റ് വലിച്ച സംഭവത്തിൽ രണ്ട് പേരെ പൊലീസ് ഈ വർഷം അറസ്റ്റ് ചെയ്തിരുന്നു.