ശാഹീൻബാഗിൽ പ്രക്ഷോഭകർക്കുനേരെ വെടിയുതിർത്തു; യു.പി സ്വദേശി പിടിയിൽ-Video

ന്യൂഡൽഹി: പൗരത്വഭേദഗതി നിയമത്തിനെതിരെ ഏറ്റവും വലിയ പ്രക്ഷോഭം നടക്കുന്ന ഡൽഹി ശാഹീൻ ബാഗിൽ സമരക്കാർക്കുനേരെ, ‘ജയ്​ ശ്രീരാം’ മുഴക്കി വെടിയുതിർത്ത യുവാവ്​ പിടിയിൽ.

രണ്ടിലേറെ തവണ വെടിയുതിർത്തെങ്കിലും ആർക്കും പരിക്കില ്ല. കപിൽ ഗുജ്ജർ എന്നയാളാണ്​ പിടിയിലായത്​. പൊലീസ്​ നോക്കിനിൽ​െക്ക ഇത്​ രണ്ടാം തവണയാണ്​ തലസ്​ഥാന നഗരിയിൽ സമാധ ാനപരമായി പ്രതിഷേധം നടത്തുന്നവർക്കുനേരെ ആക്രമണമുണ്ടാകുന്നത്​. കഴിഞ്ഞ ദിവസം ജാമിഅ മില്ലിയ്യ വിദ്യാർഥികൾക്കു നേരെ യുവാവ്​ വെടിയുതിർത്തതിൽ ഒരാൾക്ക്​ പരിക്കേറ്റിരുന്നു.

ശനിയാഴ്​ച വൈകീട്ട്​ അഞ്ചു മണിയോടെയാണ്​ ഓ​ട്ടോറിക്ഷയിൽ എത്തിയ അക്രമി ദക്ഷിണ ഡൽഹിയിലെ ശാഹീൻബാഗിൽ സമരപ്പന്തലിനു തൊട്ടരികിൽ വെടിവെപ്പു നടത്തിയത്​. ‘നമ്മുടെ രാജ്യത്ത്​ ഹിന്ദുക്കളുടെ കാര്യം മാത്രം മതി, മറ്റാരുടെയും വേണ്ട...’ എന്ന്​ ആക്രോശിച്ചുകൊണ്ട്​ വെടിവെപ്പു നടത്തിയെന്ന്​ ദൃക്​സാക്ഷികൾ പറഞ്ഞു. പൊലീസിനു തൊട്ടരികിൽനിന്നാണ്​ ഇയാൾ വെടിവെച്ചതെന്നും സ്​ത്രീകളും കുട്ടികളും ഉൾ​െ​പ്പടെ ഒ​​ട്ടേറെ പേർ അവിടെ ഉണ്ടായിരുന്നുവെന്നും ഇവർ കൂട്ടിച്ചേർത്തു.

‘‘ജയ്​ ശ്രീരാം, ഹിന്ദു രാഷ്​ട്ര സിന്ദാബാദ്​ എന്നുവിളിച്ചുകൊണ്ട്​ ഒരാൾ പ്രത്യക്ഷപ്പെട്ടു. പെ​ട്ടെന്നാണ്​ വെടിയൊച്ചകൾ കേട്ടത്​. സെമി ഓ​ട്ടോമാറ്റിക്​ തോക്കുകൊണ്ട്​ രണ്ടിലേറെ തവണ വെടിയുതിർത്തു. അയാൾക്കു തൊട്ടുപിന്നിൽ പൊലീസ്​ ഉണ്ടായിരുന്നു. പെ​ട്ടെന്ന്​ തോക്ക്​ ജാം ആയെങ്കിലും വീണ്ടും വെടിയുതിർക്കാൻ ശ്രമിച്ചു. പിന്നെ, സമീപത്തെ ചെടിക്കൂട്ടത്തിലേക്ക്​ തോക്ക്​ എറിഞ്ഞ്​ രക്ഷപ്പെടാനുള്ള നീക്കം സമരക്കാരും പൊലീസും ചേർന്ന്​ പിടികൂടുകയായിരുന്നു’ -അക്രമം നേരിട്ടു കണ്ട പ്രക്ഷോഭകരിൽ ഒരാൾ പറഞ്ഞു. ഇത്തരം അക്രമങ്ങൾ തടയുന്നതിലല്ല പൊലീസി​​െൻറ ശ്രദ്ധയെന്നും അവരുടെ കണ്ണു മുഴുവൻ തങ്ങൾക്കു​മേലാണെന്നും പ്രതിഷേധക്കാർ ആരോപിച്ചു.

പിടിയിലായ യുവാവിനോട്​ പൊലീസ്​ പേരുചോദിച്ചപ്പോൾ ഉത്തർപ്രദേശിലെ ദല്ലുപുരയിൽ നിന്നുള്ള കപിൽ ഗുജ്ജാർ ആണെന്നു പറഞ്ഞതായി, സംഭവസ്​ഥലത്തുണ്ടായിരുന്ന ശാഹീൻബാഗ്​ നിവാസിയും പ്രസാധകനുമായ അബൂ ആല സുഹാനി പറഞ്ഞു. പിടിയിലായ ആൾ ആകാശത്തേക്കാണ്​ വെടിവെച്ചതെന്നും ഉടൻതന്നെ ഉണർന്നു പ്രവർത്തിച്ച പൊലീസ്​ ആക്രമിയെ കീഴടക്കിയെന്നും ഡൽഹി പൊലീസ്​ അധികൃതർ അവകാശപ്പെട്ടു. ഇയാളുടെ കൂടുതൽ വിവരങ്ങൾ അന്വേഷിക്കുകയാണെന്നും പൊലീസ്​ കൂട്ടിച്ചേർത്തു.

ഏതാനും ദിവസം മുമ്പ്​ ഒരു പ്രാദേശിക കരാറുകാരൻ തോക്കു ചൂണ്ടി, സമരം അവസാനിപ്പിക്കാൻ ആവശ്യപ്പെട്ട സംഭവവുമുണ്ടായിരുന്നു.